Muhanga: Hakenewe Miliyari 12 mu kuvugurura ibikorwa remezo mu cyanya cy’inganda

  • AKIMANA JEAN DE DIEU
  • Mutarama 22, 2024
  • Hashize amezi 4
Image

Minisitiri w’Ubucuruzi n’Inganda, Dr Ngabitsinze Jean Chrysostome ashimira abashoramari bamaze kubaka inganda akavuga ko hakenewe miliyari 12 kugira ngo hashyirwemo ibikorwa remezo birimo imihanda, amazi n’amashanyarazi.

Yagize ati: “Muhanga mufite icyanya cy’inganda kimaze kugeramo ishoramari rya miliyari 120 ariko ibibazo by’ibikorwa remezo bihari turabizi haracyashakishwa amafaranga yo kwimura abaturage bakigituyemo ariko turateganya ko tugiye gushyiramo amazi n’amashanyarazi ndetse n’imihanda bishobora kuzatwara ingengo y’imari isaga miliyari 12 kandi turabikora vuba kuko iki cyanya n’ibindi twabihaye isumbe ryo gutunganywa vuba.”

Minisitiri Ngabitsinze avuga ko yakuze abona abafite amagare bava i Nyamagabe baza kurangura i Muhanga akavuga ko uyu mujyi wabaye uw’ubucuruzi kuva kera.

Ati: “Nkura nabonaga amagare ava iwacu i Nyamagabe bavuga ko bagiye kurangura i Muhanga ibyo bigaragaza ko uyu mujyi wabaye uw’ubucuruzi kuva kera bityo rero abacuruzi mukomeze mubikore neza muzamure ubukungu bw’Igihigu cyacu”.

Hasuwe ibikorwa by’uruganda rwa Seven Hills rukora amasafuriya

Yongeyeho ko amahirwe abanyamuhanga bafite akomoka ku kuba Igihugu cyarabahaye iki cyanya cy’inganda bakwiye kuyakoresha neza bakayabyaza amafaranga bahereye kubikorwa bakorana n’izi nganda.

Yagize ati: “Abanyamuhanga rero mufite isumbwe kuko mwahawe iki cyanya muyakoreshe neza kuko ishoramari riri muri iki cyanya rigera kuri miliyari 120 kandi aho inganda zageze zitanga akazi ku bahatuye, mukore neza kandi mukorane nazo zaba zaratangiye gushyira ibicuruzwa ku isoko cyangwa bitarahagera kuko ntawubatse uruganda utifuza gucuruza ibyo akora mukorane na bo, kuko amafaranga bakoresha ni amafaranga akomoka hanze y’u Rwanda si amafaranga yo mu gikari”.

Perezida w’Urugaga rw’Abikorera mu Karere ka Muhanga, Kimonyo Juvenal avuga ko bashimira Perezida wa Repubulika wabahaye iki cyanya cyatangiye kuba ihangiro ry’imirimo ku bakiri bato akavuga ko hari abamaze gusogongera ku mafaranga y’abashoye imari muri iki cyanya.

Ati: “Turashimira Perezida wa Repubulika Paul Kagame kuko yaduhaye iki cyanya, kuva cyatangira kimaze guhanga imirimo ibihumbi birimdwi (7000) kandi nibura abasaga 60% babonyemo akazi ni urubyiruko kandi hari bamwe mu bacuruzi bamaze gusogongera ku mafaranga ava mu bikorwa bikorerwa muri kino cyanya”.

Twishimiye ko bagiye kukigezamo ibikorwa remezo kuko urebye imiterere yaho usanga hakiburamo bimwe mu bikorwa bikenerwa aho usanga abashoramari bakirwanaho mu kuhageza amazi ndetse n’amashyarazi.

Bagirishya Jean Nepomuscene ni umucurizi wa Sima mu mujyi wa Muhanga avuga ko urwunguko rwazamutse kuri we wategerezaga ko avugana n’izindi nganda kugira ngo bayimuzanire ariko byaroroshye kuko ahamagara ku ruganda ikamyo ikaba imugezeho.

Yagize ati: “Nsanzwe ndi umucuruzi wa Sima ariko hari igihe nahamagaraga ku ruganda rwa Cimerwa nkazategereza iminsi 3 itarangeraho kandi mfite abayishaka ariko byaroroshye umuntu ambwira imifuka akeneye nkahamagara ku ruganda ikaba ingezeho ndetse mbona ngenda nzamuka kubera urwunguko mbona”.

Minisitiri Ngabitsinze avuga ko hari ibyanya bigiye gukomeza gutunganywa hashyirwamo ibikorwa remezo bikenewe harimo icyanya cy’inganda cya Muhanga, icya Rwamagana ndetse n’icyanya cy’inganda cya Huye hagamijwe gufasha ababikoreramo kubona uko bakora neza ishoramari ryabo.

Icyanya cy’inganda cya Muhanga kizajya ku buso bwa Hegitari 67 kikaba kimaze kubakwamo inganda 5 harimo inganda zatangiye gukora, Uruganda rwa ANJIA rukora Sima, Uruganda rwa Seven Hills rukora amasafuriya hakaba kandi inganda zirimo kugera ku musozo wo kubakwa harimo  uruganda rwa Basil Industry ruzakora impapuro z’isuku ndetse n’ibyo gupfunyikamo (amakarito) ruzashyira ku isoko ibicuruzwa mu kwezi kwa Gicurasi 2024, uruganda ruzakora amakaro rwa Mountain Ceramique ndetse n’uruganda ruzatunganya zahabu rwa Goldern Tree rw’abashoramari bakomoka mu gihugu cya Turquie.

  • AKIMANA JEAN DE DIEU
  • Mutarama 22, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE