Muhanga: Abandi bantu 3 bafashwe batwaye ibilo 500 by’inyama zidapimwe

  • AKIMANA JEAN DE DIEU
  • Gashyantare 6, 2024
  • Hashize ibyumweru 4
Image

Urwego rw’Igihugu rw’Ubugenzacyaha (RIB) rwemeje ko rwataye muri yombi abandi bantu batatu bo mu Karere ka Muhanga bakurikiranyweho gucuruza inyama mu buryo butemewe.

Umuvugizi w’Urwego rw’Igihugu rw’Ubugenzacyaha (RIB) Dr. Murangira B Thierry, yemeje ko abo bantu uko ari batatu bafashwe kuri uyu wa Kabiri tariki ya 06 Gashyantare 2024 nyuma yo gufatanwa ibilo 500 by’inyama bazitwaye mu modoka.

Yagize ati: “Abantu 3 bafashwe bafatiwe mu Karere ka Muhanga, Umurenge wa Shyongwe, Akagari ka Ruli mu Mudugudu wa Munyinya, batwaye inyama ibilo 500 bigaragara ko zidafite icyangombwa cy’uko zapimwe na muganga w’amatungo uzwi, n’aho zari zivanywe.”

Akomeza avuga ko abafashwe harimo Niyitegeka Theoneste w’imyaka 43, akaba umuvuzi w’Amatungo wigenga ukorera mu Murenge wa Shyongwe,  Renzaho Alfred w’imyaka 43 akaba umushoferi w’Imodoka yari ipakiye inyama zafashwe na Habuhazi Valens w’imyaka 35 wari kumwe n’umushoferi.

Umuvugizi wa RIB Dr. Murangira yasobanuye ko iperereza rigikomeje kugira ngo hamenyekane aho izo nyama  zari zivanywe ndetse hategurwe n’idosiye ishyikirizwa ubushinjacyaha.

Abo bantu uko ari batatu bafashwe bafungiwe kuri Sitasiyo ya RIB ya Nyamabuye, bakaba baje bakurikira abandi batanu bafunzwe mu mpera z’ukwezi gushize na bo bahorwa gucuruza inyama bitazwi inkomoko yazo.

Bivugwa ko abafashwe icyo gihe ku wa 29 Mutarama, ari abakurikiranyweho amakosa yo kubagira inka mu ngo z’abantu maze zigahabwa ibyangombwa by’uko zabagiwe mu ibagiro rya Misizi.

RIB iributsa abaturarwanda ko itazihanganira uwo ari we wese ukora ibyaha nk’ibi birimo icyaha cyo kwiba, gufata nabi amatungo yororerwa mu rugo, kuyakomeretsa cyangwa kuyica no gukora ubucuruzi bw’inyama butemewe bihanwa n’amategeko.

Urwo rwego ruboneraho kandi no kwibutsa abantu kwirinda ibi byaha kuko bihanwa n’amategeko kandi ko ubikoze wese azafatwa agashyikirizwa ubutabera.

  • AKIMANA JEAN DE DIEU
  • Gashyantare 6, 2024
  • Hashize ibyumweru 4
TANGA IGITEKEREZO
lg says:
Gashyantare 6, 2024 at 7:37 pm

Aho bukera inyama nukuzivaho cyangwa abantu bakajya bajya kuzigurira kwibagiro naho ubundi turya izipfishije izirwaye izibwe imbwa nibindi kandi ibibintu bimaze imyaka ninayo mpamvu abantu barwanyaga izo muli Frigo bajye bagenzura namavatiri moto amagare byose birazitwara inka zibwa zose nizo zibagwa mubwo buryo

Andika igitekerezo

AMATEGEKO AGENGA IYANDIKA RY'IGITEKEREZO CYAWE