Misiri: Abanyarwanda bahaye ikaze Amb. CG Munyuza

  • Imvaho Nshya
  • Ugushyingo 4, 2023
  • Hashize amezi 4
Image

Ku mugoroba w’ejo ku wa Gatanu tariki 03 Ugushyingo 2023, Ihuriro ry’Abanyarwanda batuye ndetse n’abakorera mu Misiri, bakiriye CG Dan Munyuza, Ambasaderi mushya uhagarariye u Rwanda mu Misiri. 

Mu butumwa bugufi buri ku rubuga rwa X rukoreshwa n’Ambasade y’u Rwanda mu Misiri, buvuga ko Amb. CG Munyuza yaganirije Abanyarwanda batuye mu Misiri abereka uruhare rwa buri wese mu rugendo rw’Ubumwe n’Ubudaheranwa bw’Abanyarwanda.

Yibukije amateka y’igihugu cyabo, ibyakozwe na Leta y’ubumwe bw’Abanyarwanda ndetse n’inzitizi zikigaragara.

Yasobanuye kandi ingamba zakoreshwa mu guhangana n’izo nzitizi.

Bagize umwanya wo kungurana ibitekerezo byatanzwe n’abarimo abanyeshuri n’abayobozi mu nzego zitandukanye zitabiriye iri huriro.

Tariki 29 Ukwakira 2023, ni bwo Amb. CG Dan Munyuza yatanze impapuro zimwemerera guhagararira u Rwanda mu Misiri.

Yazishyikirije Ambasaderi Nabil Habashi, Minisitiri w’Ububanyi n’Amahanga ushinzwe Porotokole muri Repubulika y’Abarabu ya Misiri.

Inama y’Abaminisitiri yateranye ku ya 1 Kanama 2023, yashyizeho abayobozi bashya mu nzego zitandukanye z’Igihugu, aho CG Dan Munyuza wari uherutse gusimburwa ku buyobozi bwa Polisi y’Igihugu, yagizwe Ambasaderi w’u Rwanda mu Misiri.

Amb. CG Munyuza yagiye kuri uyu mwanya asimbuye Alfred Kalisa wari muri izi nshingano.

U Rwanda na Misiri bifitanye umubano urenze uwa politiki, ibihugu byombi bisangiye kuba mu isoko rusange rihuza ibihugu byo mu Burasirazuba no mu Majyepfo ya Afurika (COMESA), iryo soko ryemerera ibihugu birigize kohererezanya ibicuruzwa nta misoro.

Amb CG Dan Munyuza, ahagarariye u Rwanda mu Misiri
Amb CG Munyuza yagize umwanya wo kuganira n’Ihuriro ry’Abanyarwanda batuye mu Misiri

KAYITARE JEAN PAUL

  • Imvaho Nshya
  • Ugushyingo 4, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE