Michael Carrick yagizwe umutoza w’agateganyo wa Manchester United

Umwongereza Michael Carrick yagizwe Umutoza w’Agateganyo wa Manchester United kugeza uyu mwaka w’imikino wa 2025/26 urangiye muri Kamena.

Iyi kipe yabitangaje kuri uyu wa Kabiri, tariki ya 13 Mutarama 2026, aho nta mutoza yari nyuma yo kwirukana Umunya-Portugal Ruben Amorim wari uyimazemo amezi 14, yirukanwe ku wa 5 Mutarama.

Si ubwa mbere Carrick w’imyaka 44, agiye gutoza Manchester United kuko yaherukaga mu 2021 asimbuye Ole Gunnar Solskjaer wari umaze amaze kwirukanwa.

Yatsinze imikino ibiri, anganya umwe muri iyo mikino itatu, ariko ahita ava muri iyi kipe ubwo Ralf Rangnick yari ahawe akazi ngo asoze umwaka w’imikino.

Michael Carrick yakiniye Manchester United imikino 464 hagati ya 2006 na 2018, nyuma yo kugurwa na Sir Alex Ferguson muri Tottenham.

Kuri ubu nta kazi yari afite nyuma yo kwirukanwa na Middlesbrough yo mu Cyiciro cya Kabiri mu Bwongereza muri Kamena, amaze imyaka ibiri n’igice mu kazi.

Manchester United izasubira mu kibuga ku wa Gatandatu, tariki ya 17 Mutarama 2026, aho izakira Manchester City mu mukino w’umunsi wa 22.

Kuri ubu, iyi kipe iri ku mwanya wa Karindwi n’amanota 32, irushwa 17 na Arsenal ya mbere.