M23 yafatiye ingabo z’u Burundi ku rugamba ibimenyesha amahanga

  • Imvaho Nshya
  • Ugushyingo 6, 2023
  • Hashize amezi 4
Image

Umutwe wa M23 uri mu mirwano n’igisirikare cya Repubulika Iharanira Demokarasi ya Congo (FARDC) n’abagifasha barimo Wazalendo na FDLR, watangaje ko wafashe mpiri abasirikare b’ingabo z’u Burundi.

Umuvugizi w’umutwe wa M23 mu bya  Politiki, Lawrence Kanyuka, yatangaje ko bafashe abasirikare b’Abarundi mu mirwano ikomeje kubahuza n’ingabo za Leta ya Congo n’abazifasha.

Icyakora mu gutangaza aya makuru M23 ntiyemeje niba aba basirikare ari abari mu butumwa bwa EAC bw’ingabo z’Afurika y’Iburasirazuba (EACRF).

Uretse aba basikare  b’Abarundi bafashwe kandi, Kanyuka yahamije  ko  M23 yafashe n’intwaro nyinshi n’ibikoresho bya gisirikare, ingabo za Congo Kinshasa zataye zigahunga.

Ati: “Kandi twafashe abasirikare b’Abarundi bari mu mugambi wo kumaraho ubwoko. M23 iraza gutanga amakuru arambuye.”

Mu minsi ishize ubwo imirwano yuburaga M23 yashinje ingabo z’u Burundi kubaza zaranyuranyije n’amasezerano yemejwe n’Abakuru b’Ibihugu by’Afurika y’Iburasizuba agamije kugarura amahoro muri Congo, aho yasabaga ko M23 irekura uduce yari yarambuye FARDC mu mirwano yabaye mu mwaka wa 2022,   ikaduha ingabo za EACRF z’umuryango wa EAC, hagakurikiraho kuganira na Guverinoma ya Kinshasa bakemura ibibazo mu mahoro.

M23 yavuze ko ibice hafi ya byose yabirekuye ibisigira Ingabo za EAC ariko ibyo yasigiye ingabo z’u Burundi zaje muri ubu butumwa, ihamya ko zaduhaye ingabo za FARDC n’abambari bayo bica bakanasahura abaturage ari na yo mpamvu yongeye kutugarukamo irwana kugira ngo yongere icungire umutekano abaturage.

Perezida wa M23 Bertrand Bisimwa, kuri iki Cyumweru yatangaje ko  mu masaha ya mugitondo, M23  yatewe n’ingabo za Leta ya Congo n’abazifasha barimo FDLR, abacanshuro b’abazungu n’imitwe ya Wazalendo, igitero cyagabwe mu nkengero z’Umujyi wa Kitchanga, muri Masisi, mu gace ka  Bwiza, no mu gace ka  Kwitabi.

Amakuru avuga ko kandi hari imirwano yabaye ku Cyumweru, yatumye M23 ifata uduce twa Burungu, Nyakabingu, Kabalekasha, Kashagari n’igice cy’ahitwa Rujebeshe, muri Teritwari ya Masisi, nyuma yo kwirikana abitwa Wazalendo bari bahanganye.

Iyi mirwano yongeye gukara nyuma yaho ku wa Gatanu w’icyumweru gishize, igisirikare cya Congo, FARDC n’ingabo z’Umuryango w’Abibumbye zoherejwe mu butumwa bwo kugarura amahoro (MONUSCO) biyemeje gufatanya mu bikorwa bya gisirikare byiswe Operasiyo Springbok bigamije kurinda umujyi wa Goma n’agace ka Sake muri Masisi ngo bitigarurirwa n’inyeshyamba za M23.

M23 kandi yenameje ko imirwano kuri uyu wa mbere yaramukiye mu gace ka Kibumba, mu birometero 20 uvuye mu Mujyi wa Goma.

ZIGAMA THEONESTE

  • Imvaho Nshya
  • Ugushyingo 6, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE