Kinshasa: Dr. Ngirente yahagarariye Perezida Kagame mu nama ku mahoro n’umutekano

Minisitiri w’Intebe w’u Rwanda Dr. Edouard Ngirente ari mu Bakuru b’Ibihugu n’abandi bayobozi bahuriye mu nama ya 10 yiga ku ishyirwa mu bikorwa ry’Amasezerano y’Amahoro, Umutekano n’Ubutwererane muri Repubulika iharanira Demokarasi ya Congo (Rwanda) no mu Karere k’Ibiyaga Bigari, iteraniye i Kinshasa mu Murwa Mukuru wa RDC.

Dr. Ngirente yahagarariye Perezida wa Repubulika Paul Kagame muri iyo nama ibaye ku nshuro ya 10 itegurwa n’Urwego rukurikirana ishyirwa mu bikorwa ry’amasezerano yashyiriweho umukono i Addis Abeba muri Ethiopia agamije amahoro, umutekano n’ubufatanye hagati ya RDC n’Akarere k’Ibiyaga Bigari.  

Iyo nama yanitabiriwe na Perezida wa Komisiyo y’Umuryango w’Afurika Yunze Ubumwe Moussa Faki Mahamat, n’abayobozi ku rwego rwo hejuru bahagarariye Abakuru b’Ibihugu bamwe na bamwe batabashije kuyibonekamo.

Perezida wa RDC Antoine Felix Tshisekedi Tshilombo wanashyikirijwe inshingano zo kuyobora uru rwego, yagaragaje ko nyuma y’imyaka 9 aya masezerano y’i Addis Abbeba ashyizweho umukono, hari impinduka nyinshi zabaye mu bufatanye bwa RDC n’Akarere k’Ibiyaga Bigari.

By’umwihariko yagarutse ku ngufu zishyizwe mu kurwanya imitwe ihungabanya umutekano muri ibi bihugu byo mu Karere cyane ikorera mu mashyamba ya Repubulika Iharanira Demokarasi ya Congo.

Perezida wa Komisiyo y’Umuryango w’Afurika Yunze Ubumwe Mussa Faki Mahamat, yashimye uburyo ibihugu byo muri aka karere bigenda bikemura ibibazo birimo ibyo kutumvikana mu rwego rwa politiki, ndetse n’amakimbirane ashingiye ku mipaka.