Kigali: Igitera abagabo guharira abagore ibyo gukingiza abana

  • KAMALIZA AGNES
  • Ukuboza 10, 2023
  • Hashize amezi 3
Image

Hari bamwe mu bagabo bavuga ko impamvu badakunze kwitabira gahunda yo kujya gukingiza abana cyangwa ngo baherekeze abagore babo babiterwa no kuba baba bahugiye mu mirimo iteza imbere urugo kandi inatanga amafaranga atuma uwo mubyeyi ndetse n’umwana yabyaye bamererwa neza.

Ni mu gihe ubushakashatsi buherutse bwakozwe n’Ikigo Rinda Ubuzima, bwagaragaje ko 96% ari bo abana bitabira gahunda yo gukingizwa mu gihe 4% bo batabyitabira bigashyira ubuzima bwabo mu kaga gakomeye.

Ikigo Rinda Ubuzima, kigaragaza ko abagabo bagize ubushake bagafata iya mbere bagaherekeza abagore babo gukingiza abana icyo cyuho cyagabanyuka.

Bamwe mu bagabo bo mu Mujyi wa Kigali, babwiye Imvaho Nshya ko impamvu batitabira gahunda yo gukingiza abana babo babiterwa no gushaka imibereho y’urugo.

Rusanganwa Pholoribert ati: “Iyi Kigali tubamo turya ari uko twakoze nkatwe ba nyakabyizi usanga tubayeho mu buzima aho bigusaba kwirirwa ushaka amafaranga kugira ngo ubone igitunga abana n’umugore, kandi mu rugo hakenerwa ibintu byinshi namwe murabizi. Ubu rero kumbwira ngo naherekeje umugore tugiye kwirirwa kwa muganga dukingiza ubwo se urumva umunsi utaba upfuye? Ahubwo we kuko aba ari no mu kiruhuko cyo kubyara yajyayo ubundi akaza kumbaza icyo akeneye.”

Yongeyeho ko bikunda ko haboneka umwanya ntacyamubuza guherekeza umudamu we cyane ko umwana aba ari uwabo bombi.

Iradukunda Francis nawe ati: “Njye guherekeza umudamu wanjye simbyanze ariko ubuzima bwo gushakisha ntibwankundira ko muherekeza. Nkubu njye nkora akazi k’ubufundi kandi sinareka kujya mu kiraka cyane ko akazi kabuze ngo ngiye kwa muganga. Umugore wanjye aba abizi neza ko mukunda ntawundi mutima mubi watuma ntabikora.”

Umulisa Marie Michel, Umuyobozi w’Ikigo Rinda Ubuzima, avuga ko abagabo bitabiriye gahunda yo kujya gukingiza abana babo ikigero cya 100% cyagerwaho cyane ko igihe umugore abyaye aba afite intege nke.  

Ati: “Icyo twabonye ni uko abagabo bajyana abana kubakingiza ari bake cyane birasa nk’aho bigihariwe abagore, abagabo baramutse babyitabiriye hari icyo byadufasha kuko ni bo bafite imbaraga cyane ko iyo umubyeyi abyaye aba agifite intege nke, ndashishikariza abagabo kwitabira iyi gahunda kuko byafasha.”

Julien Mahoro Niyingabira, Umuyobozi w’ishami rishinzwe itumanaho mu Kigo cy’Igihugu cy’Ubuzima (RBC), avuga ko gahunda yo gukingiza ari inshingano z’ababyeyi bombi bitagomba kuba inshingano z’umubyeyi umwe.

Ati: “Gahunda zo gukingiza abana uba usanga ahanini ziharirwa ababyeyi b’abamama mu gihe ari inshingano z’ababyeyi bose. Ibi rero ntibikwiye ko biba inshingano z’umubyeyi umwe kandi bombi bahari, abagabo baramutse bagize uruhare mu kwitabira izi gahunda z’ikingira byazamura umubare bikanoroshya n’imibanire hagati y’umugabo n’umugore.”

Yongeyeho ko abantu bakwiye kwigishwa bagahindura imyumvire kugira ngo bumve neza akamaro k’urukingo ku mwana cyane ko ari ibiba bituma ubuzima bwe buba bwiza kurushaho no gutuma abana b’ejo bazigira ubuzima buzira indwara.

  • KAMALIZA AGNES
  • Ukuboza 10, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE