Kenya: Hatangiye imyitozo y’ingabo za EAC izafasha kurwanya imitwe y’iterabwoba

Umuryango wa Afurika y’Iburasirazuba (EAC) watangije imyitozo ya 14 y’Ingabo zayo. Ni imyitozo yatangirijwe ku mugaragaro i Nairobi muri Kenya, ihuza abasirikare, abapolisi n’abakozi ba gisivili baturutse mu bihugu bigize EAC, mu rwego rwo kongerera ubushobozi Akarere kugira ngo gashobore gukorera hamwe no guhangana n’ibibazo by’umutekano mucye.

Imyitozo mpuzamahanga yiswe ‘Ushirikiano Imara’, igamije kongerera ubushobozi ibikorwa bihuriweho mu bikorwa byo kubungabunga amahoro, kurwanya iterabwoba, kurwanya ubujura ndetse no guhangana n’ibiza, binyuze mu mahugurwa ahuriweho n’imyitozo yo kuyobora ibikorwa.

Imyitozo yatangiye ku wa 6 Gicurasi ikazageza ku wa 28 Gicurasi 2026, yatangijwe ku mugaragaro kuri uyu wa 14 Gicurasi 2026 muri Ulinzi Sports Complex i Nairobi.

Itangazo Umuryango EAC washyize hanze, rivuga ko mu muhango wo gutangiza habayeho guhererekanya ibendera rya EAC nk’ikimenyetso cy’ubumwe, ubufatanye n’ubwitange bw’ibihugu bigize uyu muryango mu kubungabunga amahoro, umutekano n’ubufatanye mu Karere.

Hon. Andrea Aguer Ariik Malueth, Umunyamabanga Mukuru Wungirije wa EAC ushinzwe Ibikorwa remezo, Ubukungu, Imibereho Myiza na Politiki, yashimangiye ko amahoro, umutekano n’ubumwe bikomeje kuza ku isonga mu bikorwa by’Umuryango wa Afurika y’Iburasirazuba.

Hon. Malueth yagaragaje akamaro ko guhanahana amakuru ku gihe no gukomeza ubufatanye bw’Akarere mu guhangana n’ibibazo by’umutekano bikomeje guhindagurika mu Karere.

Yagize ati: “Agace ka Afurika y’Iburasirazuba gakomeje guhura n’ibibazo by’umutekano kandi bifitanye isano, birimo iterabwoba, ibyaha bikorwa n’imitwe mpuzamahanga ndetse n’umutekano muke mu bihugu duturanye. Ibi bibazo bisaba ubufatanye bukomeye bw’Akarere, guhanahana amakuru ku gihe, guhuza uburyo bw’imikorere ndetse n’imikoranire ifatika hagati y’inzego zacu z’umutekano n’igisirikare.”

Mu myaka ishize, imyitozo ya Ushirikiano Imara, yabaye kimwe mu bimenyetso bifatika byerekana ubushake bwa EAC bwo kwimakaza amahoro n’ubufatanye mu by’umutekano mu Karere. Imyitozo ikomeje gufasha mu gushimangira uburyo bwo kuyobora ibikorwa, guhuza ibikorwa bya gisirikare, gutegura ibikorwa bihuriweho ndetse n’imikoranire y’inzego zitandukanye hagati y’ibihugu bigize EAC.

Umugaba Mukuru Wungirije w’Ingabo za Kenya, Lt. Gen. John Omenda, yongeye gushimangira akamaro k’umutekano usangiwe n’ubufatanye bw’Akarere mu guteza imbere amahoro, ituze n’ubushobozi bwo guhangana n’ibibazo.

Yagize ati: “Ushirikiano Imara si intambwe gusa mu mahugurwa, ahubwo ni ishusho y’icyerekezo rusange n’intego duhuriraho. Binyuze mu bufatanye no kwiyemeza kwa EAC, dushobora kubaka ubushobozi bwo guhangana n’iterabwoba rituruka ku mitwe y’iterabwoba n’iy’abagizi ba nabi nka Al-Shabaab na Boko Haram. Nta gihugu cyihagije ukwacyo.”

Maj. Gen. John Nkoimo, Umuyobozi w’imyitozo ya Ushilikiano Imara mu ngabo za Kenya, yavuze ko insanganyamatsiko y’iyi myitozo igira iti: “Kongerera Akarere ubushobozi bwo kwitegura amahoro, umutekano n’ubudaheranwa”.

Yasobanuye ko igamije kunoza imikoranire, kwitegura neza no kongera ubushobozi bw’ingabo z’ibihugu byinshi zikora ibikorwa bihuriweho. Muri iyi myitozo, abayitabiriye bazakora ibikorwa bitandukanye byo kuyobora ibikorwa bya gisirikare bigamije kongera ubushobozi bwo gukorera hamwe, gukorana neza no gukemura ibibazo by’umutekano. Bizakomeza gushimangira ubushake bw’ibihugu bigize EAC bwo kurinda amahoro n’umutekano by’Akarere.