Kazoza ntagikeneye kumva iby’Abakono

  • Imvaho Nshya
  • Nyakanga 25, 2023
  • Hashize amezi 10
Image

Kazoza Justin wari uherutse kwimikwa nk’umutware w’Abakono, yahise yegura kuri ubwo butware yicuza ko yakoze amakosa akomeye.

Ni imbabazi yasabiye mu nama y’Umuryango FPR Inkotanyi yateranye ku cyumweru tariki 23 Nyakanga, yongera kubigarukaho ejo ku wa Mbere mu kiganiro n’itangazamakuru.

Avuga ko tariki ya 09 Nyakanga 2023 hakozwe igikorwa cyo kumuha ubutware bwo kuyobora umuryango w’Abakono.

Bakora icyo gikorwa, baje gusanga ari amakosa akomeye bakoze nyuma yo guhabwa impanuro na Nyakubahwa Perezida wa Repubulika akaba na Chairman w’Umuryango FPR Inkotanyi, Paul Kagame.

Avuga ko atabonye umwanya uhagije mu nama y’Umuryango RPF Inkotanyi kugira ngo agire icyo avugaho ku byakozwe n’Abakono, akaba yahisemo kubivugira mu itangazamakuru.

Ubutumwa afite ngo ntiyabubonera inyito ariko aricuza agasaba abanyamuryango bagenzi be kutagwa mu makosa nk’ayo yaguyemo.

Ati “Umutimanama wanjye waje kundya, unyereka ko nakoze ibintu by’amakosa mabi cyane ashingiye gucamo ibice Abanyarwanda kuko kwironda nk’Abakono ni ikintu kibi cyane gishobora gutuma Abanyarwanda cyangwa u Rwanda dusubira mu bibi rwahuye nabyo mu myaka 29 ishize.

Nahisemo gusaba imbabazi Chairman wacu akaba na Perezida wa Repubulika y’u Rwanda Paul Kagame, abanyamuryango ba RPF Inkotanyi dusangiye umuryango ndetse n’abanyarwanda muri rusange”.

Ibyabaye yakomeje kubitekerezaho cyane asanga hari ibyo agomba kwicuza nk’umukada w’umuryango, nk’umunyarwanda ukwiye kuba intangarugero mu bandi banyarwanda.

Ati: “Icya mbere ni uko kiriya gikorwa twakoze twabuze ubushishozi, njyewe ubwanjye nabuze ubushishozi, mbura kureba kure, bingwisha mu makosa navuga y’agahomamunwa.

Rero nkaba nicuza mbikuye ku mutima kandi mpamya ntashidikanya ko bitazongera kumbaho uko byagenda kose”.

Ingamba yafashe ni ukubwira Abakono ko akimara kumva ko ikosa baguyemo, yaguyemo ubwe ryo kwitwa ngo ni umutware w’Abakono.

Yagize ati “Guhera igihe nabyumviye mu mutima wanjye nahise negura ko ntari umutware, simbishaka, sinshaka no kubyumva kuko umuryango dufite, ni umuryango wa RPF.

Nta mpamvu yo gushyiraho izindi nzego z’umuryango cyane ko ibyo imiryango yita ko igiye gukemura byose, bikemurwa n’inzego zihari Leta yadushyiriyeho.

Ibyo bintu twari twagiyemo cyangwa tumaze iminsi tujyamo, ni ibintu bisubiza u Rwanda nk’igihugu cyacu inyuma.

[…] abari mu nzego bari mu miryango nyarwanda, bivuze ngo n’Abakono baba barimo, nta mpamvu yo kuvuga ngo ugiye kurema inzego mu zindi”.

Akomeza agira ati “Ibyo bintu n’abantu batekereza batyo, baba abo mu yindi miryango nyarwanda bari bafite gahunda zimeze zityo cyangwa bazifite, mfashe uyu mwanya kugira ngo nzamagane kuko naguye mu makosa.

Nkwiye kuba urugero rw’abandi kugira ngo be kuzongera kugwa mu makosa nk’ayo naguyemo ahubwo twese dufatanyirize hamwe nk’Abanyarwanda, twubake Igihugu gishyize hamwe, twubaha ireme ry’ubumwe bw’Abanyarwanda nkuko ari imwe mu ndangagaciro z’Umuryango RPF Inkotanyi”.

Yanditswe na KAYITARE JEAN PAUL

  • Imvaho Nshya
  • Nyakanga 25, 2023
  • Hashize amezi 10
TANGA IGITEKEREZO
Eugene Murekezi says:
Nyakanga 26, 2023 at 7:56 am

Ni hahandi, batweretse icyo bari cyo. Abantu 800 bose ngo bahuye batashishoje!! Uuuuu!

Andika igitekerezo

AMATEGEKO AGENGA IYANDIKA RY'IGITEKEREZO CYAWE