Inzego z’umutekano z’u Rwanda n’iza Mozambique zambuye ibyihebe utundi duce

  • NTAWITONDA JEAN CLAUDE
  • Gashyantare 8, 2022
  • Hashize imyaka 2
Image

Mu minsi ibiri ishize, Inzego z’umutekano z’u Rwanda n’iza Mozambique zafatanyije kugaba ibitero ku byihebe byasigaye mu bice bya Pundanharna Nhica do Ruvuma mu burengerazuba bw’Akarere ka Palma ko mu Ntara ya Cabo Delgado.

Ubuyobozi bw’Ingabo z’u Rwanda bwatangaje ko muri iyo minsi ibiri ishize, inzego z’umutekano z’u rwanda n’iza Mozambique zafatanyije muri ibyo bikorwa bigamije gukubura inyeshyamba zisigaye muri ibyo bice.

Inzego z’umutekano za Mozambique (FADM)n’iz’u Rwanda (RSF) zabohoje agace ka Nhica do Ruvuma n’aka Pundanhar duherereye  mu bilometero 55 uvuye mu mujyi wa Palma. Utwo duce twuzi cyane ku mirima minini ihhingwamo imyumbati.

Ibiturage byaho byari byarigaruriwe n’ibyihebe bisigaye, nka hamwe byari byarahinduye indiri yabyo byihishamo mu mugambi wo kugerageza kwigarurira uduce byatakaje mu bikorwa bya mbere inzego z’u Rwanda n’iza Momzambique zafatanyijemo zikabyamurura mu gihe gitoo gishobokamu mwaka ushize.

Ingabo za SADC na zo zamaze kumenyeshwa ko zatanga ubufasha mu gukumira umwanzi waba agerageza mu bice zahawe kurindira umutekano.

Umugaba w’Ingabo na Polisi u Rwanda rwohereje muri Mozambique Maj Gen I Kabandana, yasuye abasore n’inkumi bagabye igitero bari ku itabaro mu gace ka Pundanhar nyuma y’igihe gito gakuwe mu maboko y’ibyihebe.

Mu butumwa yabagejejeho, yabashimiye ndetse ashimangira ko bakwiye guhora bari maso, kurangwa n’ikinyabupfura no gukoresha imbaraga zabo ku rwego rwo kurinda hagamijwe kugera ku ntego yabo nta wakomeretse cyangwa hakomeretse bake bashoboka.

Kuri uyu wa Kabiri, Perezida wa Repubulika y’u Rwanda Paul Kagame na we yagarutse ku murimo ukomeye abasore n’inkumi u Rwanda rwohereje muri Mozambique bakoze, agaragaza ko bamaze kugarura umutekano w’Igihugu ku kigero kiri hejuru ya 85%.

Ati “Igice kinini cya Cabo Delgado cyabonye umutekano. Ingabo z’u Rwanda, Abapolisi, izindi nzego zose zagiyemo zikorana n’ingabo za Mozambique kugira ngo zikemure icyo kibazo na cyo navuga nka 85% cyarakemutse, 15% uduce duto tw’aba bantu basigaye, bahunze bajya mu bindi bice batari barimo ubu barabakurikirana na bo kugira ngo na ho bahasukure neza.”

Perezida Kagame yavuze ko u Rwanda rwagiye gutanga ubufasha mu Ntara ya Cabo Delgado guhera muri Nyakanga 2021, mu gihe imitwe yitwaje intwaro yari yari yarigaruriye igice kinini cy’iyo ntara nini cyane kandi ikungahaye ku mutungo kamere utandukanye.

  • NTAWITONDA JEAN CLAUDE
  • Gashyantare 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE