Impamyabumenyi z’abanyeshuri 563 bakopeye zateshejwe agaciro

Impamyabumenyi z’abanyeshuri 563 bakopeye zateshejwe agaciro

Minisiteri y’Uburezi yatangaje ko impamyabumenyi n’amanota by’abanyeshuri 563 bakopeye mu bizamini bya Leta bisoza amashuri yisumbuye by’umwaka w’amashuri wa 2025-2026 zateshejwe agaciro, nyuma y’iperereza ryagaragaje ko bakoze uburiganya.

Itangazo Minisiteri y’Uburezi yasohoye ku wa 19 Ugushyingo 2026 rivuga ko abo banyeshuri bagaragaye mu iperereza ryakozwe ku bakandida bakekwagaho gukopera mu bizamini bya Leta bisoza amashuri yisumbuye.

Iri perereza ryakorewe abakandida 1 097 bari barakekwagaho uburiganya. Muri bo, 30 basanzwemo nta buriganya bakoze, bityo amanota yabo aratangazwa.

Ku rundi ruhande, iperereza ryagaragaje abandi bakandida 563 bakopeye, bituma umubare w’abanyeshuri bose byemejwe ko bakopeye ugera ku 1 630.

Minisiteri y’Uburezi yatangaje ko amanota y’abo bakandida 563 n’impamyabumenyi zabo byateshejwe agaciro, mu gihe Ikigo cy’Igihugu Gishinzwe Ibizamini n’Ubugenzuzi bw’Amashuri (NESA) kizasuzuma uko buri mukandida yabonye amanota, kikamenya niba yaragize uruhare mu buriganya.

Icyo cyemezo kigamije kurinda ubusugire bw’ibizamini bya Leta no gukomeza kwimakaza ubutabera n’uburinganire mu banyeshuri bose babikora.

Nubwo impamyabumenyi zabo zateshejwe agaciro, abo banyeshuri bazahabwa amahirwe yo gukomeza amasomo yabo, ariko bagasabwa kubahiriza amabwiriza agenga imyigire n’imyitwarire y’abanyeshuri.

Minisiteri y’Uburezi yatangaje ko abagizweho ingaruka n’icyo cyemezo bazemererwa gusubiramo umwaka wa nyuma w’amashuri yisumbuye mu mashuri basanzwe bigamo cyangwa bakimukira mu yandi mashuri, hubahirijwe amabwiriza abigenga.

Abifuza kandi kwiyandikisha gukora ibizamini bya Leta nk’abakandida bigenga bazabikora bakurikije amabwiriza abigenga.

Minisiteri y’Uburezi yashimangiye ko izakomeza guharanira ubwangamugayo n’ubuziranenge mu mitegurire n’imikorere y’ibizamini bya Leta, inashishikariza abanyeshuri kubahiriza amabwiriza agenga ibyo bizamini.

Sangiza abandi iyi nkuru
Ibitekerezo

Nta gitekerezo kiratangwa. Ba uwa mbere gutanga igitekerezo.

Andika igitekerezo

AMATEGEKO AGENGA IYANDIKA RY'IGITEKEREZO CYAWE

Inkuru ziheruka
  1. Huye: Ibikorwa remezo by’imyidagaduro byafunguriye urubyiruko amahirwe i Mbazi 20 Ugushyingo 2026 Saa 17:04
  2. Afurika y’Epfo: Abagore hafi 600 bishwe mu mezi atatu gusa 20 Ugushyingo 2026 Saa 16:53
  3. NRS yasabye Sena ubuvugizi bwihariye ku rubyiruko rufite imyitwarire ibangamiye abaturage 20 Ugushyingo 2026 Saa 16:50
  4. Maj Gen Nyakarundi yitabiriye inama ya EAC yiga ku mutekano 20 Ugushyingo 2026 Saa 16:47
  5. Nyamasheke: Guhuza Imirenge SACCO byongereye ingano y’inguzanyo 20 Ugushyingo 2026 Saa 14:25