Ikigo cyaguze CIMERWA cyiteguye gushora miliyari 189 Frw mu Rwanda

  • NTAWITONDA JEAN CLAUDE
  • Ugushyingo 26, 2023
  • Hashize amezi 3
Image

Ubuyobozi bwa Devki Group, Ikigo giherutse kugura imigabane ya CIMERWA, bwahishuye ko buteganya gushora mu Rwanda miliyoni zisaga 154 z’amadolari y’Amerika, ni ukuvuga miliyari zirenga 189 z’amafaranga y’u Rwanda, mu gukora sima nyinshi na garaviye bihagije bitarenze mu mwaka wa 2024.

Icyo kigo mpuzamahanga cyubatse izina mu gutunganya sima gifite icyicaro muri Kenya, giherutse kwegukana 99.94% by’imigabane y’uruganda rwa CIMERWA, ikazajya icungwa n’Uruganda National Cement Holdings Limited (National Cement) rumwe mu zihuriye muri icyo kigo.

Umuyobozi Mukuru wa Devki Group Narendra Raval, yatangarije The East African, ko ku ikubitiro bateganya gushora miliyoni ziri hagati ya 45 na 60 z’amadolari y’Amerika mu ruganda rwa CIMERWA hagamijwe guhagarika burundu itumizwa rya sima hanze y’u Rwanda.

Nyuma y’imyaka ibiri n’igice iri imbere, Devki Group irateganya kongeramo irindi shoramari ku buryo ingano ya sima itunganywa buri mwaka izava kuri toni 270,000 ikagera kuri toni miliyoni 1.8 ku mwaka nyuma yo kongeramo izindi miliyoni 62 z’amadolari y’Amerika.

Narendra Raval yagize ati: “Turashaka ko u Rwanda ruhinduka igihugu kitagitumiza sima mu mahanga mbere y’uko umwaka wa 2024 urangira.”

Kongera ubushobozi bwa CIMERWA bije mu gihe urwo ruganda ruherereye i Bugarama mu Karere ka Rusizi, aho rufite umutungo kamere uvamo sima, rutangaje imishinga itandukanye y’ibikorwa remezo.

Nanone kandi CIMERWA yanatangaje ko yongereye imbaraga mu guharanira imikoranire myiza n’abayihagarariye ku isoko.

Devki Group ifite ibikorwa bitandukanye mu gutunganya sima, gutunganya ibyuma, amabati n’andi masakaro, gutunganya ifumbire n’ibikoresho byo gupfunyikamo.

Ni ikigo gifite inganda za sima n’iza garaviye zikorera muri Kenya ndetse hakaba hari n’uruganda rwa sima gifite mu Burasirazuba bwa Uganda, ahitwa i Tororo hegereye ku mupaka wa Kenya.  

Nyuma yo kuvugurura uruganda rwa CIMERWA, icyo kigo kizageza ku bushobozi bwo gutunganya nibura toni miliyoni 10 za sima ku mwaka, aho kizaba gishimangiye ubu ubudahangarwa gifite nk’ikigo kiyoboye muri Afurika y’Iburasirazuba.

Raval yashimangiye ko Devki Group yiyemeje kugirana ubufatanye burambye na CIMERWA, ati: “Twizeye amahirwe ari muri ubu bucuruzi n’ababukoramo, kandi tunejejwe n’amahirwe tubonye yo kurushaho gushyigikira iterambere ry’ibikorwa remezo mu Karere, cyane ko bijyanye n’imigambi yacu yo kwaguka.”  

Muri gahunda y’ubucuruzi ya Devki Group y’umwaka utaha wa 2024, ni ho hagaragara gahunda yo gushora miliyoni zisaga 154 z’amadolari yAmerika mu bukungu bw’u Rwanda hagamijwe kongera umusaruro wa sima ndetse n’uwa garaviye.

Ubuyobozi bwa Devki Group bwaboneyeho no gushimangira ko CIMERWA igiye gukurwa ku Isoko ry’Imari n’Imigabane ry’u Rwanda, kugira ngo byorohere National Cement kubanza kuyishyira ku murongo no kongera umusaruro itanga ubashe guhura n’ingano ya sima ikenewe ku isoko ry’u Rwanda n’irya Repubulika Iharanira Demokarasi ya Congo (RDC).

Yavuze ko mu gihe kuri ubu isoko ry’u Rwanda rikenera nibura toni 600,000 ku mwaka, biteganywa ko iyo ngano ishobora kwiyongera cyane kubera imishinga migari y’ubwubatsi bw’ibikorwa remezo irimo Ikibuga cy’Indege  Mpuzamahanga cya Bugesera no kuvugurura Sitade Amahoro.

Mu rwego rwo kuvugurura imikorere, biteganywa ko 40% by’imigabane ya CIMERWA izashyirwa ku isoko, abashoramari bo muri Afurika y’Iburasirazuba bagahabwa amahirwe yo kuyigura.

  • NTAWITONDA JEAN CLAUDE
  • Ugushyingo 26, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE