CIMERWA yiteze iterambere ku kugurwa n’uruganda rukomeye muri Kenya

  • NTAWITONDA JEAN CLAUDE
  • Ugushyingo 20, 2023
  • Hashize amezi 6
Image

Ubuyobozi bw’Uruganda rwa CIMERWA rwishimiye kwakira Uruganda National Cement Holdings Limited (National Cement) rwo muri Kenya nk’umufatanyabikorwa w’igihe kirekire uzagira uruhare mu kwagura ibikorwa mu Karere k’Afurika y’Iburasirazuba.

Mu itangazo ryatangajwe ku wa Gatanu tariki ya 17 Ugushyingo, Ikigo PPC cyari gisanzwe gifite imigabane myinshi muri CIMERWA PLC, cyatangaje ko cyamaze kwinjira mu masezerano na National Cement yo kugura 99.94% by’urwo ruganda.

National Cement ni kimwe mu bigo bigize Devki Group, Ikigo Mpuzamahanga cyubatse izina mu gutunganya sima, ibikoresho byo gusakaza inyubako, ifumbire ndetse n’ibikoresho byo gupfunyikamo.

Icyo kigo gifite uruganda rutunganya sima, uruconga amabuye ndetse n’izindi nyinshi zisya akavamo umucanga na garaviye.

Biteganyijwe ko urwo ruganda rwa Devki Grpoup ruzagura imigabane ya CIMERWA ku giciro cya miliyoni 42.5 z’amadolari y’Amerika, ni ukuvuga amafaranga y’u Rwanda asaga miliyari 52 z’amafaranga y’u Rwanda.

Impuguke mu by’ubukungu zivuga ko iyo ntambwe yatewe na CIMERWA ishimishije cyane kuko ishobora kuba intangiriro yo kwagura sima nyarwanda mu Karere k’Afurika y’Iburasirazuba, no mu ruhando mpuzamahanga.

CIMERWA yari isanzwe ifitwe na PPC yagiragamo imigabane ingana na 51% mu gihe indi migabane ingana na 59% yari isaranganyijwe mu bandi banyamigabane nk’Ikigo cy’Ubwiteganyirize mu Rwanda (RSSB), Agaciro Development Fund (AgDF), Rwanda Investment Group na Sonarwa General Insurance Company Holdings Ltd.

Imiyoborere ihamye ya CIMERWA ifatanyije n’abanyamigabane, yatumye iki kigo gikora impinduka haba mu mikorere ndetse no mu kwinjiza amafaranga.

CIMERWA yiteguye kwagura isoko ryayo rikagera no mu Karere

Umuyobozi Mukuru wa CIMERWA Regis Rugemanshuro, yavuze ko kwakira National Cement ku isoko ry’u Rwanda bizongera umusaruro no kwimakaza iterambere.

Ati: “Twiteguye kwakira National Cement nk’umunyamigabane wacu mushya. Twizeye ko bafite ubushobozi bw’amafaranga n’ubwa tekiniki bukenewe mu gushyigikira iterambere rya CIMERWA no kwagukira mu Karere nk’uko biri mu cyerekezo cyacu.”

Yakomeje agira ati: “Turagira ngo dushime abanyamigabane dufite kugeza uyu munsi ku bw’inkunga baduteye mu myaka ishize kandi tugashimangira ukwiyemeza dufite mu kubakira ku ntsinzi tumaze kugeraho twongera umusaruro wacu mu Karere.”

Devki Group inafite uruganda rusya amabuye mu Burasirazuba bwa Uganda, kugura CIMERWA bikaba biri muri gahunda yagutse y’icyo kigo mu kwagura izina ryacyo no gutanga umusanzu mu iterambere ry’ibikorwa remezo mu Karere k’Afurika y’Iburasirazuba n’umugabane muri rusange.

Umuyobozi Mukuru wa Devki Group Dr. Narendra Raval, yavuze ko bakomeje kureba uko barushaho gushora imari mu gukora sima ihagije hagamijwe gutanga umusanzu wabo mu iterambere ryihuta ry’ibikorwa remezo mu Rwanda no mu Karere.

Ati: “Twiyemeje kugira ubufatanye burambye na CIMERWA. Twizera amahirwe y’ubu bucuruzi n’ababukoramo kandi tunejejwe n’amahirwe twahawe yo gushyigikira iterambere ry’ibikorwa remezo mu Karere, bikaba bijyanye n’icyerekezo twihaye.”

Roland van Wijnen, Umuyobozi Mukuru w’Ikigo PPC Ltd cyo muri Afurika y’Epfo cyacungaga imigabane ya PPCIH, yavuze ko afitiye icyizere National Cement cyo kuba bazaziba icyuho mu guhaza isoko rya sima.

Yakomeje agira ati: “Iyi ni intambwe ya nyuma muri gahunda ya PPC yo kwibanda ku masoko yo muri Afurika y’amajyepfo igakura ikirenge mu mitungo y’Afurika yo hagati n’iy’iburasirazuba. Twagiranye umubano w’igihe kirekire kandi watanze umusaruro na CIMERWA mu izina ry’Inama y’Ubuyobozi ya RPC Ltd, Ndagira ngo nshimire ubuyobozi bwa CIMERWA bwadushyigikiye mu myaka ishize kandi nkabifuriza amahirwe masa mu rugendo rushya.”

Yavuze ko National Cement ari uruganda rwubashywe kandi rukunzwe n’abatari bake mu Karere, bityo ko na CIMERWA izubakira kuri ubwo bunararibonye mu kongerera agaciro umusaruro itanga.

Uruganda rwa CIMERWA rwashinzwe mu mwaka wa 1984 rukaba rumaze imyaka ikabakaba 40 rukora sima nyarwanda. Uruganda ruherereye mu Murenge wa Bugarama mu Karere ka Rusizi.

NTAWITONDA JEAN CLAUDE

  • NTAWITONDA JEAN CLAUDE
  • Ugushyingo 20, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE