Ikibazo cy’u Rwanda na RDC ku meza ya Loni, abahunze barasaga 86,000

  • NTAWITONDA JEAN CLAUDE
  • Kamena 2, 2022
  • Hashize imyaka 2
Image

Kuki inyeshyamba za M23 zongeye kuzura umugara mu gihe mu ntangiriro za Nyakanga 2022 Intara ya Kivu y’Amajyaruguru yiteguye kwakira Umushumba wa Kiliziya Gatolika ku Isi Papa Francis? Kuki M23 yagabye ibitero mu gihe Leta ya Repubulika Iharanira Demokarasi ya Congo (RDC) yatangiye ibiganiro n’imitwe yitwaje intwaro?

Kuki igihe cyose M23 izuye umutwe [cyangwa ishatse guharanira uburenganzira bw’abavuga ururimi rw’Ikinyarwanda mu Ntara ya Kivu y’Amajyaruguru], igihugu gihita kiza mu mu mitwe y’Abanyekongo ari u Rwanda?

Ibyo ni bimwe mu bibazo byibajijwe n’Ambasaderi wa RDC mu Muryango w’Abibumbye Christophe Lutundula, yabajije Abadipolomate n’abandi bayobozi bahuriye mu Kanama k’Umutekano k’Umuryango w’Abibumbye. Ingingo nyamukuru yaganiriweho ku wa Kabiri taliki ya 31 Gicurasi, ni iy’ibibazo by’umutekano byazutse mu Burasirazuba bwa RDC aho byarenze ikibazo cya M23 bikaba ikibazo cy’Akarere kose.

Kimwe mu bibazo byagarutsweho cyane kandi giteje inkeke ni icy’urwango rwakomotse ku binyoma byahimbwe n’abayobozi ko M23 ifashwa n’u Rwanda, bikaba bikomeje gukoreshwa mu guhembera urwango ku Banyarwanda n’abavuga Ikinyarwanda babarizwa ku butaka bwa RDC.

Ku wa Gatatu, Abaturage b’i Bukavu bagaragaye bigabije imihanda n’ibyapa byamagana u Rwanda, bagenda basubiramo amagambo y’indirimbo bahimbye agira ati: “Abanyarwanda bose basubire iwabo…” Impuguke mu bya Politiki zisanga hatagize igikorwa hashobora kuvuka indi Jenoside mu cya kinyejana 21.

Aha iyo bavuga Abanyarwanda, bakubiramo n’Abanyekongo bose bavuga Ikinyarwanda bavukiye ku butaka bwa Congo ndetse na ba sekuruza babo bakaba ari ho hari gakondo yabo, kuko amateka yaranze Akarere k’Ibiyaga Bigari mu Gihe cy’Abakoloni yatumye abaturage b’ibihugu bivanga kubera impamvu zishingiye ku kuba u Rwanda, u Burundi na Congo byarigeze kuba ibihugu bimwe mu gihe cy’Abakoloni b’Ababiligi.

Amateka kandi agaragaza ko ikatwa ry’imipaka ryatumye bimwe mu bice byari iby’u Rwanda n’u Burundi byomekwa kuri RDC, bityo abaturage bometsweho bakomeza umurage na gakondo y’ibihugu bomoweho.

Umuryango w’Abibumbye uhangayikishijwe y’ingaruka z’ayo makimbirane ku basivili, by’umwihariko abagore n’abana bibasiwe n’ubuhunzi ndetse n’abashobora guhohoterwa muri ibi bihe by’umutekano muke.

Imibare itangwa n’Ishami ry’Umuryango w’Abibumbye ryita ku Mpunzi (UNHCR) igaragaza ko abamaze gukurwa mu byabo n’intambara ya M23 na FARDC basaga 86 000 barimo abarenga 75 000 bahungiye mu bindi bice bya RDC ndetse na 11 000 bahungiye muri Uganda.

Imbere y’Akanama k’Umutekano ka Loni Amb. Christophe Lutundula, yongeye gushinja u Rwanda ko ari rwo rwateye RDC ariko Amb. Claver Gatete w’u Rwanda aramunyomoza ashimangira ko ibyo birego bidashingiye ku bihamya bifatika.

Amb. Christophe Lutundula yagize ati: “Aha turavuga abagore, abana, abageze mu zabukuru buzuye imihanda ya Rutshuru, imihanda ya Rumangabo, bahunga urupfu, bikoreye imizigo ku mitwe bashakisha amahoro. Ba Nyakubahwa mufate iki kibazo mu nshingano.”

Amb. Gatete yavuze ko gushinja u Rwanda kuba rufasha umutwe wa M23 ari ibirego bidafite ishingiro kuko ikibazo cy’uwo mutwe ari icy’Abanyekongo bagomba kwikemurira kuko kiri imbere mu gihugu cyabo.

Ati: “Mu by’ukuri u Rwanda nta nyungu n’imwe rufite yo guteza umutekano muke muri RDC. Leta y’u Rwanda isanga ibyo birego bishingiye ku gushaka gushyira amakimbirane hanze y’Igihugu mu nyungu za Politiki y’imbere, ibyo biteje akaga kandi bikwiye kwamaganwa.”

Amb. Gatete yakomoje no ku bufatanye bweruye buri hagati y’ingabo za RDC (FARDC) n’umutwe w’iterabwoba wa FDLR umaze imyaka 28 ugerageza guhungabanya umutekano w’u Rwanda.

Nyuma y’amagambo yavugiwe i New York, umwe mu bayobozi bakuru mu ngabo za FARDC yagaragaye ashimangira ko igihugu cye gishyigikiye FDLR, anavuga ko mu myaka 28 uwo mutwe utigeze ugaba ibitero ku Rwanda, ibyo bikaba bihabanye n’ukuri kw’ibyo Abanyarwanda baturiye umupaka uhuza ibihugu byombi bahuye na byo mu bihe bitandukanye.

Binavugwa ko ibisasu biheruka kumishwa ku butaka bw’u Rwanda n’abasirikare ba RDF bashimuswe mu mpera z’ukwezi gushize, FARDC yari ibifashijwemo na FDLR.

Madamu Martha Ama Akyaa Pobee wari ahagarariye Umunyamabanga Mukuru w’Umuryango w’Abibumbye Antonio Guterres, yasabye Akanama k’Umutekano ka Loni gukora ibishoboka byose bagashakira umuti urambye ibibazo by’umutekano muke muri RDC no guhagarika burundu umutwe wa M23.

Ku rundi ruhande, Angola yatangiye urugendo rwo guhuza ibihugu byombi no gushaka umuti w’amakimbirane binyuze mu biganiro n’ubwumvikane. Biteganyijwe ko mu minsi iri imbere, Perezida w’u Rwanda Paul Kagame na mugenzi we wa RDC Felix Antoine Tshisekedi Tshilombo bazahura imbonankubone nyuma y’ibiganiro bagiranye kuri telefoni mu minsi ibiri itangira iki cyumweru.

  • NTAWITONDA JEAN CLAUDE
  • Kamena 2, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE