Iburasirazuba:  Hahizwe  kuvana mu bukene abaturage 100 muri buri kagari 

  • NTAWITONDA JEAN CLAUDE
  • Gashyantare 1, 2022
  • Hashize imyaka 2
Image

Uyu munsi ku wa 1 Gashyantare 2022, kwizihiza Umunsi w’Intwari z’u Rwanda mu Ntara y’Iburasirazuba byahujwe n’igikorwa cyo gusinya imihigo yo kurwanya ubukene no kurengera umwana, byakorewe mu Nama Mpuzabikorwa zabaye mu turere twose tw’iyi Ntara. Mu mihigo yasinywe harimo uwo kuvana mu bukene abaturage 100 muri buri kagari.

Imihigo yasinywe hagati y’Umurenge, urubyiruko rw’abakorerabushake n’Akarere.

Umunyamabanga wa Leta  muri Minisiteri y’Ubutegetsi  bw’Igihugu ushinzwe imibereho myiza  Ingabire Assumpta yashimye  iyi mihigo,  avuga ko ari intambwe ikomeye  iganisha ku  bikorwa by’indashyikirwa.

 Yagize ati: “Kuba iyi Ntara yafashe iya mbere bakiyemeza guhangana n’ibibazo bibangamira uburenganzira bw’umwana no kuvana mu bukene nibura abaturage 100 muri buri kagari, ni intambwe ikomeye iganisha ku bikorwa by’indashyikirwa bihindura ubuzima bw’abaturage”.

By’umwihariko yagarutse ku buremere bw’ibibazo bibangamiye abana, avuga ko imibare (ku rwego rw’igihugu)  igaragaza ko 33% by’abana bari munsi y’imyaka 5 bagwingiye, kandi bagomba kuba bagabanutse mu mwaka wa 2024 bakagera nibura kuri 19% n’ubwo na bo bakiri benshi.

Yagarutse no ku kibazo cy’ihohotera  rikorerwa abana agira ati: “Nk’uko mubizi, ibibazo birebana no guhohotera abana biteye inkeke; umubare w’abana basambanywa ugenda uzamuka ku buryo mu mwaka wa 2020, abana bagera kuri 19 701 bahohotewe. Murabizi ko ingaruka zivamo zikomeye ku mikurire n’imitekerereze y’umwana”.

Guverineri w’Intara y’Iburasirazuba CG Gasana K. Emmanuel

Muri izo ngaruka harimo no gutwara inda ku bangavu aho, raporo ya DHS yagaragaje ko 5% by’abangavu batewe inda.

Imihigo yasinywe ikaba yitezweho umusaruro ufatika mu guhangana n’ibi bibazo.

Imihigo  yo kurengera abana ikubiyemo  kurwanya imirire mibi n’igwingira mu bana; kugarura abana mu ishuri; kubakura  mu buzererezi no kubarinda imirimo ivunanye.

Iyo  kurwanya ubukene  ikubiyemo ibikorwa bitandukanye bigamije gufasha  abaturage kubuvamo birimo  kubakangurira  kwibumbira mu matsinda yo kwiteza imbere no kuzigama; kwigisha imyuga urubyiruko no kurufasha kwibumbira mu matsinda, n’ibindi.

Guverineri w’Intara y’Iburasirazuba CG Gasana K. Emmanuel  yavuze ko gusinya iyi mihigo ari ukongera kwiyemeza nk’abayobozi kugira ngo bakomeze guhangana n’ibibazo bikigaragara bibangamira uburenganzira bw’abana ndetse no kurwanya ubukene.

 Atanga ubutumwa bujyanye n’Umunsi w’Intwari z’Igihugu, yaboneyeho gusaba  buri wese kurangwa n’indangagaciro y’ubutwari no gukunda igihugu,  yibutsa  abayobozi mu byiciro bitandukanye gufatanya n’abaturage kwihutisha iterambere ry’Akarere,  gushyira mu bikorwa Politiki ya Leta, hagamijwe iterambere ry’umuturage.

Yakomeje agira ati: “Ubutwari ni imwe mu ndangagaciro zaranze Abanyarwanda kuva kera, bikaba bivuze: guharanira icyagirira Abanyarwanda akamaro mu buryo bwo kugira Igihugu gifite ubusugire, giteye ishema abagituye, kandi gitera imbere buri gihe”.

Guverineri w’Intara y’Iburasirazuba CG Gasana K. Emmanuel yavuze ko kwizihiza uyu munsi ari umwanya wo gushimira, kubahiriza ubutwari bw’abanyarwanda ndetse no kwimeyeza gukomeza ubutwari.

Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza Ingabire Assumpta
  • NTAWITONDA JEAN CLAUDE
  • Gashyantare 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE