Ibitaro bya Nyabikenke byakiraga abarwayi 35 ku munsi byongereye serivisi

  • AKIMANA JEAN DE DIEU
  • Ukuboza 18, 2023
  • Hashize amezi 5
Image

Ubuyobozi bw’Ibitaro by’Akarere bya Nyabinkenke biherereye mu Murenge wa Kiyumba, Akarere ka Muhanga, byatangaje ko guhera kuri uyu wa Mbere tariki ya 18 Ukuboza byongereye serivisi z’ubuvuzi ku zari zisanzwe n’abaganga bariyongera.

Iyo nkuru yagaruye icyizere mu baturage bari barihebeshejwe no kuba umwaka wari ushize ibyo bitaro bifite ubushobozi bwo kwakira abarwayi 35 ku munsi kubera ubuke bw’abaganga na serivisi zari zikiri nkeya.

Serivisi nshya zitangira gukora ni serivisi zihabwa ababyeyi babyarira ku rwego rw’ibitaro (Maternity &Cesarian Section), ubuvuzi bwagenewe impinja (Neonatology), n’ubuvuzi bw’amaso (Ophthalmology).

Izo serivisi zije ziyongera ku zindi zatangiye gukora ku ya 8 Ukuboza 2022, ari zo serivisi z’indembe (emergency), iz’indwara zo mu mubiri (Internal Medicine), na serivisi z’indwara z’abana (Pediatrics).

Ni mu gihe hashize ibyumweru bigera kuri bitatu abagana ibyo bitaro bahawe na Perezida Paul Kagame, bagaragaje ko batabonera serivisi ku gihe kubera ubuke bw’abaganga na serivisi zidahagije, bagahitamo kujya kuzishakira i Ruli mu Karere ka Gakenke bambutse uruzi rwa Nyabarongo.

Ubuyobozi bw’ibyo bitaro bwamenyesheje abaturage bo mu Mirenge ya Kiyumba, Rongi, Kibangu, Nyabinoni na Kabacuzi yo muri aka Karere, ko izo serivisi zongerewe mu kurushaho kubegereza ubuvuzi bakenera bakabubonera ku gihe batarinze gusiragira.

Abaturage bo mu Mirenge ituriye ibyo bitaro, bavuga ko izo mpinduka zitanga icyizere kuko zigiye gutuma baruhuka ingendo bakoraga bajya gushakira serivisi hakurya ya Nyabarongo.

Bavuga ko kuri ubu nta mubyeyi uzongera kujya kubyarira mu Bitaro bya Kabgayi cyangwa ngo abe yagorwa no kubonera uruhinja rwe ubuvuzi, uwarwaye amaso na we ngo abe yarembera mu rugo kubera kubura uko yigeza mu Bitaro bivura amaso bya Kabgayi.

Ubuyobozi bw’Ibitaro bya Nyabikenke, buvuga ko nta muturage ukwiye kigira impungege ngo akore ibilometero byinshi agiye gushaka izo serivisi usanga ari na zo zikenerwa n’abatari bake.

Umuyobozi Mukuru w’Ibitaro bya Nyabikenke Dr Nkikabahizi Fulgence, avuga ko bishimiye kuba bahawe abaganga bo kubafasha gusuzuma no gutanga inama ku barwayi babagana ndetse bizagabanya ingendo bajyaga bakora bagiye kwivuriza i Kabgayi ndetse no hakurya ya Nyabarongo  mu Turere dukikije Muhanga.

Yagize ati: “Ni byo kuri iyi tariki haratangira gutangwa serivisi zihabwa ababyeyi babyara ku rwego rw’ibitaro by’Akarere, haba ku babyara neza ndetse n’abashobora gufashwa kubyara babazwe, ariko kandi turatangira gutanga serivisi ku bana b’impinja zitarengeje iminsi 30 kuko iz’abayirengeje zo zatangwaga guhera mu Kuboza 2022 ndetse  na serivisi zo kuvura amaso abayarwaye”.

Akomeza avuga ko ubu bizeye ko uwivurizaga kure agomba kugana ibi bitaro agahabwa serivisi nta nkomyi, ku bijyanye na serivisi zitatangwaga.

Yagize ati: “Turizera ko abaturage bajyaga gushaka izo serivisi mu Turere duturanye bazajya bazihererwa hafi y’aho batuye ndetse ahubwo n’abo muri utwo Turere akaba ari bo bahindukira bakagana Ibitaro bya Nyabikenke, kandi na serivisi yo guca mu cyuma (Radiotherapy) na yo twizeye ko izakora vuba kuko dutegereje ko Ikigo cy’Igihugu gishinzwe Ubuziranenge (RSB) kiduha ibyangombwa by’ubuziranenge serivisi igahabwa abatugana”.

Yongeyeho ko ibi bitaro bifite abaganga b’inzobere bagera ku icyenda kuko muri uku kwezi k’Ukuboza 2023 bahawe abadogiteri bane  ndetse hiyongeraho  abaganga batera ikinya bakanakangura umubiri bagera kuri 4 n’abaforomo batanu.

Yavuze ko bafite icyizere cyo kubona n’abandi kuri ubu barimo gutegurirwa amabaruwa abinjiza mu kazi mu gihe cya vuba.

Ibitaro bya Nyabikenke byatangiye gukorerwamo tariki ya 8 Ukuboza 2022 bitangirana serivisi zirimo kwakira abarwayi b’indembe, ubuvuzi bw’Indwara zo mu mubiri ndetse na serivisi z’uburwayi bw’indwara z’abana.

Ni ibitaro bikorana n’ubwishingizi bubarizwa mu Kigo cy’Ubwiteganyirize mu Rwanda (RSSB), mu Ishami rya RAMA na Mituweli,  ndetse n’ubwishingizi bw’ubuzima bw’Inzego z’umutekano (MMI).

Abaturage bishimiye ko batazongera kwambuka Nyabarongo bajya gushaka serivisi z’ubuvuzi basize Ibitaro iwabo
  • AKIMANA JEAN DE DIEU
  • Ukuboza 18, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE