Gakenke: Intandaro yo kubura isoko ry’inanasi kugeza n’aho zitemerwa ingurube

  • NGABOYABAHIZI PROTAIS
  • Ukuboza 15, 2023
  • Hashize amezi 5
Image

Umusaruro w’inanasi mu Karere ka Gakenke wakomeje kwiyongera kugeza uyu munsi, aho abahinzi bishimira ko wiyongereye bitewe n’imbaraga zishyirwa mu bukangurambaga no kongera umusaruro w’ubuhinzi.

Ukwiyongera k’umusaruro kwari umugisha ukomeye ku bahinzi bo mu Mirenge ya Mataba, Gakenke, Gashenyi, na Minazi kugeza mu mwaka wa 2022 ubwo rumwe mu nganda bagemuragaho umusaruro zibegereye rufungiye imiryango.

Abahinzi bavuga ko kuri ubu inanasi zabahombeye kubera kubona umusaruro mwinshi ariko bakabura isoko ryazo, aho bamwe bemera amafaranga make kugera no ku biceri 80, abandi bagahitamo kuzitemera ingurube banga kuzipfusha ubusa ngo ziborere mu mirima.  

Ikibazo cy’ibura ry’isoko ku nanasi kivugwa mu makoperative y’abahinzi  bazo ndetse n’abahinga inanasi ku giti cyabo, ibi ngo bikaba biterwa ni uko bamwe mu bari abakiliya ba hafi bahagaritse bimwe mu bikorwa byabo.

Ndagijimana Theogene wo mu Murenge wa Gakenke, Akagari ka Nganzo, Umudugudu wa Karuganda, avuga ko kugeza ubu umusaruro wabo ubapfira ubusa kubera ko nta giciro gihamye cy’inanasi bafite.

Yagize ati: “Dutanga amafaranga mu buhinzi bw’inanasi ariko tubabwaza nuko muri iyi minsi abamamyi basigaye baza kutwubikaho urusyo bakagura inanasi ku mafaranga 250 imwe, mu gihe twagurishaga ku kilo ku ruganda rwa COVAFGA ikora imitobe n’inzoga mu nanasi ku mafaranga 185, twifuza ko twabona isoko rihoraho kandi ku giciro nyacyo”.

Nizeyimana Ildephonse ukora ubuhinzi bw’inanasi kuri hegitari 2.5, yavuze ko kuri ubu hari n’inanasi igura amafaranga y’u Rwanda ari hagati ya 50 na 80.

Yagize ati: “Kugeza ubu ibiciro by’inanasi biratunaniye kuko ubu inanasi imwe ni amafaranga 350, kandi ubwo tuba twayikoreje ku mafaranga 100, urumva ko inanasi iba iguze amafaranga 250. Ubwo na bwo ni ku isoko rya Gakenke, ibi biterwa nuko uruganda rwatunganyaga umutobe w’inanasi muri Gakenke rwahagaze undi uzigura ni Nyirangarama nawe ntabwo yazimara, iyo umumamyi aje mu rugo azigura ku mafaranga 100 kugeza kuri 200 hari n’ubwo iya nyuma ayigura 80. Iyo zabuze isoko mu buryo bugaragara tuzitemera ingurube.”

Ndagijimana Theogene wo mu Murenge wa Gakenke avuga ko bakeneye isoko ry’inanasi byihutirwa

Akomeza agira ati: “Hari igihe zera zikaba nyinshi tukabura amasoko tuzishyiramo, icyo gihe tuzitemera ingurube kuko n’abo bamamyi hari ubwo zibananira kubera ko zabaye nyinshi.”

Mu rwego rwo kumenya icyaba gitera ihananuka ry’igiciro cy’inanasi Imvaho Nshya yasuye rumwe mu nganda zitunganya umusaruro ukomoka ku nanasi rwitwa COVAFGA rukorera mu Murenge wa Gakenke, ubuyobozi bwarwo buvuga ko kuba batakoraga biri mu byagabanyije igiciro abahinzi babonaga.

Umuyobozi w’urwo ruganda Nyiratebuka Bernadette, yemeje ko igiciro cyagabanyutse kubera ko muri iyi minsi batakirimo gukora kandi baraguraga umusaruro urenga toni 7 mu cyumweru.

Yagize ati: “Ubu sinakubwira ngo ibiciro hano bihagaze neza kuko birumvikana ko isoko ry’inanasi ryabuze cyane ko nk’ubu twaguriraga abahinzi inanasi zigera kuri toni 7.5 mu cyumweru. Urumva niba tutakigura izo zose zabuze isoko, hanze aha inanasi ntabwo ziri kugurwa cyane nk’ubu ku isoko rya Gakenke byageraga sa tanu zashize mu isoko none bisigaye bigera saa cyenda inanasi zikiri mu isoko.”

 Yakomeje agira ati: Twe hano twabaguriraga ku kilo amafaranga 185, ubwo rero umuhinzi wagurisha kuri icyo giciro urumva ko yahombye. Ubu iyo ngiye kugura inanasi nziza imwe yaguraga amafaranga 500 nyigura amafaranga 300.”

Kuba inanasi zigurwa ku mafaranga make byashimangiwe  n’umukozi ushinzwe ubuhinzi mu Karere ka Gakenke  Sylivain Niyibizi,   nyuma yo gusura abahinzi b’inanasi mu Murenge wa Mataba.

Yagize ati: “Ni byo koko mu bahinzi b’inanasi nasuye nasanze umusaruro uhari ubu inanasi nziza igura amafaranga 300, kugeza n’ubwo inanasi ya nyuma ntoya igura amafaranga 50. Ubu rero turakomeza gukora ubuvugizi mu nzego bireba kuko iki kibazo twagihagurukiye”.

Kuba igiciro cy’inanasi cyaramanutse mu buryo bugaragara, nanone Minisiteri y’Ubucuruzi (MINICOM) na yo ihamya ko iki kibazo ikizi ndetse irimo kugishakira umuti.

Mukaniyonzima Dativa Umukozi ushinzwe uruherekane nyongera gaciro imboga , indabo n’imbuto muri MINICOM, yavuze  ko barimo gushaka umuti urambye w’iki kibazo.

Yagize ati: “Ubu tuvugana abakozi b’uruganda Inyange bagiye gusura abahinzi bo mu Mirenge izwiho kweza inanasi nyinshi harimo Mataba, Gakenke, Gashenyi, na Minazi, nyuma yaho rero uru ruganda nirumara kubona umusaruro uko ungana ruzagirana amasezerano n’aba bahinzi bajye baruha umusaruro”.

Uyu mukozi akomeza avuga ko kuba inanasi zarabuze isoko biterwa n’uko abazikoreshaga cyane bagabanyutse muri Gakenke.

Yagize ati: “Ubundi icyamanuye ibiciro by’inanasi, amakuru dufite n’ubushakashatsi twakoze ni uko uruganda rukora umutobe n’inzoga mu nanasi rwitwa COVAFGA rwahagaritse ibikorwa byarwo kuva mu kwezi k’Ukwakira 2022, rukaba rwaraguraga inanasi zisaga toni 7. Undi waguraga inanasi ni Nyirangarama urumva we mu cyumweru atwara toni imwe n’igice ntiyahaza isoko rero.

MINICOM ivuga ko irimo gukurikirana iby’iki kibazo ku buryo mu minsi ya vuba abahinzi batazongera gutaka ibihombo, ndetse n’umusaruro w’inanasi ukongera kugira agaciro kawo ku isoko.

Akarere ka Gakenke kugeza ubu ni kamwe mu twera inanasi mu buryo bushimishije ariko abahinzi baracyagorwa no kubona isoko ryazo.

Nyiratebuka Bernadette, Umuyobozi w’Uruganda COVAFGA
Abahinzi bavuga ko babuze umusaruro mu gihe hari abaturage bavuga ko umusaruro wiyongereye
  • NGABOYABAHIZI PROTAIS
  • Ukuboza 15, 2023
  • Hashize amezi 5
TANGA IGITEKEREZO
B CROPS Ltd says:
Ukuboza 15, 2023 at 12:06 pm

Bagane company ya B Crops Ltd.

Andika igitekerezo

AMATEGEKO AGENGA IYANDIKA RY'IGITEKEREZO CYAWE