Duhoshe intambara nk’uko duhosha imihindagurikire y’ibihe- Perezida Kagame

  • Imvaho Nshya
  • Nzeri 21, 2023
  • Hashize amezi 8
Image

Perezida wa Repubulika y’u Rwanda Paul Kagame yasabye ibihugu by’Afurika gushyira imbaraga no kwiyemeza mu guhosha intambara nk’uko byahagurukiye rimwe mu guhangana n’imihindagurikire y’ibihe.

Umukuru w’Igihugu yabigarutseho ku wa Gatatu tariki ya 20 ubwo yagezaga ijambo ku Nteko Rusange y’Umuryango w’Abibumbye iteraniye i New York muri Leta Zunze ubumwe z’Amerika (USA) ku nshuro ya 78.

Mu ijambo rye, Perezida Kagame yavuze ko u Rwanda n’ibindi bihugu by’Afurika, ndetse n’ibyo ku yindi bigabane bikiri mu nzira y’amajyambere, bifite ubushake bwo gukorana n’abafatanyabikorwa batandukanye mu guhangana n’ikibazo cy’imihindagurikire no gushaka ibisubizo birambye.

Ati: “Uwo ni umusaruro w’ingenzi w’Inama Nyafurika yiga ku mihindagurikire y’ibihe iheruka kubera i Nairobi [muri Kenya] iyobowe na Perezida William Ruto. Gusa nanone, ntitugomba guhosha imihindagurikire y’ibihe gusa. Tugomba guhosha n’intambara.”

Perezida Kagame yanagarutse ku buryo iterambere ry’ibihugu bikizamuka ribangamirwa n’inyungu zihanitse ku nguzanyo, byakwa n’ibihugu byateye imbere.

Perezida Kagame yagize ati: “Ibihugu biri mu nzira y’amajyambere bibangamiwe n’ibibazo by’imyenda harimo n’igiciro kinini ku nguzanyo. Ibi rero bituma habaho ubusumbane mu bukungu bikadindiza intambwe zacu twese zituganisha ku ntego z’iterambere rirambye. Impamvu nyamukuru y’iki kibazo ni inyungu nyinshi zisabwa n’ibihugu byateye imbere, bigamije gukusanya umutungo wo kwirengera mu gihe kirekire”.

Yakomeje agira ati: “Uyu munsi nta kimenyetso cy’uko intambara zirimo kuba zizarangira vuba. Nta n’icyizere tubona, kiva mu bafite ububasha bwisumbuye, ko iherezo ryaba riri bugufi. Ubuzima bw’inzirakarengane buratereranwa zikikorezwa umutwaro w’umutekano muke.

Perezida Kagame yakomoje no ku kandi karengane kagaragara ku Isi gashingiye ku kibazo cy’abimukira bafata ingendo ziteje akaga buri mwaka barimo gushaka aho babona ahazaza.

Yakomeje agaragaza ko u Rwanda rutazatezuka ku gukorana n’abafatanyabikorwa barimo Ishami ry’Umuryango w’Abibumbye ryita ku Mpunzi (UNHCR) mu guharanira ko impunzi, abimukira n’abasaba ubuhungiro babona ahazaza harushijeho kuba heza kandi habahesha agaciro.

Ati: “Iki cyemezo gishingiye ku bunararibonye bwacu, kandi tuzi ububabare tutabariwe n’abandi bwo kubura byose no kutagira aho wita imuhira. Ibyo biri mu bigize isezerano ryo kutagira n’umwe dusigaza inyuma.”

Yagize ati: “Dukeneye ubufatanye butajegajega kugira ngo iki kibazo gikemuke. Mu bihugu bikiri mu nzira y’amajyambere kandi, dufite inshingano zo kunoza imiyoborere yacu mu by’ubukungu n’imicungire y’umutungo kamere”.

Perezida Kagame avuga kandi ko ibihugu biri mu nzira y’amajyambere, usanga bihura n’ingaruka zo kwishyura amafaranga y’umurengera kubera amadovize, hakaziramo n’ingaruka za politiki kandi ziba zidafite ishingiro. Ako ni akarengane gakomeye.

Umukuru w’Igihugu avuga ko ibihugu biri mu nzira y’amajyambere, usanga bihura n’ingaruka zo kwishyura amafaranga y’umurengera kubera amadovize, hakaziramo n’ingaruka za Politiki kandi ziba zidafite ishingiro.

Perezida Kagame yavuze kandi ko ishami ry’Umuryango w’Abibumbye ryita ku buzima (OMS), ryatangaje ko icyorezo cya COVID-19 kitakiri ikibazo cyihutirwa ku buzima ku Isi, ibyo bikaba ari ibyo kwishimira.

Yagize ati: “Isi ikomeje kugenda izanzamuka kandi neza, ariko ikibabaje ni uko umurongo wo gutangira urwo rugendo rwo kuzanzamuka utabaye umwe kuri bose hirya no hino mu Turere dutandukanye.

Inama y’uyu mwaka ku Ntego z’Iterambere Rirambye (SGDs) yongeye kugaragaza impungenge zijyanye n’umuvuduko muke wo kuzishyira mu bikorwa, ndetse ndaboneraho gushimira Umunyamabanga Mukuru kuba akomeje kwibanda kuri icyo kibazo”.

Perezida Kagame yakomoje no ku bikorwa byo kubungabunga amahoro, agaragaza ko hakiri urugendo aho Afurika ikwiye guhabwa umwanya ku meza afatirwaho ibyemezo birebana n’ahazaza h’Umugabane.

Inama y’uyu mwaka ku Ntego z’Iterambere Rirambye (SGDs) yongeye kugaragaza impungenge zijyanye n’umuvuduko muke wo kuzishyira mu bikorwa, ndetse ndaboneraho gushimira Umunyamabanga Mukuru kuba akomeje kwibanda kuri icyo kibazo”.

Perezida Kagame yakomoje no ku bikorwa byo kubungabunga amahoro, agaragaza ko hakiri urugendo aho Afurika ikwiye guhabwa umwanya ku meza afatirwaho ibyemezo birebana n’ahazaza h’Umugabane.

NTAWITONDA JEAN CLAUDE

  • Imvaho Nshya
  • Nzeri 21, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE