DRC: Intwaro za rutura mu zifashishijwe mu kugota urugo rwa Moise Katumbi

  • KAYITARE JEAN PAUL
  • Mutarama 9, 2024
  • Hashize amezi 2
Image

Ku mugoroba wo ku wa Mbere tariki 08 Mutarama 2024, Radiyo y’Abafaransa France24 yatangaje ko urugo rwa Moise Katumbi umwe mu batavuga rumwe n’Ubutegetsi bwa Repubulika Iharanira Demokarasi ya Congo akaba anaherutse kwiyamamariza ku mwanya wa Perezida, rwagoswe n’inzego zishinzwe umutekano.

France24 itangaza ko byasabye ko inzego z’umutekano zikoresha intwaro ziremereye mu kugota urugo rwa Katumbi.

Ni mu gihe Jacques Kyabula Katwe, Guverineri w’Intara ya Katanga, yategetse abashinzwe umutekano kuva ku rugo rwa Moise Katumbi.

Umuvugizi wa Katumbi yatangaje ko inzego z’umutekano zari zamaze kuva ku rugo rwa Katumbi aho atuye, zikaba zari zamubujije kuhava.

Guverineri wa Katanga, Jacques Kyabula Katwe, yavuze ko ari amakosa yakozwe na bamwe mu bashinzwe kubahiriza amategeko.

Kyabula yatangaje ko inzego z’umutekano zari zishinzwe kurinda inyubako kugira ngo ntihagire abagizi ba nabi bayisambura.

Mu butumwa bwashyizwe ku rubuga rwa X, Kyabula Katwe yavuze ko yatanze amabwiriza yihutirwa yo kuvanaho bariyeri yari yashizweho kandi bikorwa mu buryo bwihuse.

Katumbi yaje ku mwanya wa Kabiri n’amajwi 18% mu matora y’umukuru w’igihugu aherutse kuba muri DRC.

Moise Katumbi yifatanije n’abandi banyapolitike batavuga rumwe na Leta mu gusaba ko amatora asubirwamo cyane ko ngo yaranzwe n’ubujura.

Mu itangazo ryashyizwe hanze ku Cyumweru, Katumbi yasabye amahanga kutemera imibare y’ibyavuye mu matora aherutse kuba nkuko byatangajwe n’Ibiro Ntaramakuru by’Abongereza (Reuters).

  • KAYITARE JEAN PAUL
  • Mutarama 9, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE