Donald Trump yasabwe kwishyura hafi miliyoni 500 Abanyamakuru batatu

Ubucamanza bwa New York muri Amerika bwategetse Donald Trump wigeze kuba perezida w’Amerika, kwishyura ibihumbi 400 by’amadorali y’Amerika, ni ukuvuga asaga 480,000,000 Frw.

Aya mafaranga agomba kuyishyura ikinyamakuru, The New York Times n’abanyamakuru bacyo batatu bakora inkuru zicukumbuye.

Ni amafaranga The New York Times, n’abanyamakuru bayo Batatu bakoresheje mu kuburana na Trump mu rubanza yabajyanyemo abarega kumurengera mu nkuru y’icukumbura yamukozweho ishingiye ku mutungo we ndetse n’amanyanga yakoze mu kutishyura imisoro n’amahoro.

The New York Times n’abanyamakuru bayo barimo Susanne Craig, David Barstow na Russell Buettner batsinze urwo rubanza mu kwa Gatanu 2022.

Danielle Rhoads, Umuvugizi wa The New York Times, yatangaje ko icyemezo cy’ubucamanza bwa New York ari ubutumwa bukomeye ku bibaza ko bashobora gucecekesha abanyamakuru.

Mu 2018, inkuru icukumbuye ya The New York Times ku mutungo n’imisoro by’umuryango wa Trump, yatumye iki kinyamakuru cyegukana igihembo kizwi nka Pulitzer Prize gihabwa abanyamakuru baba bakoze inkuru zidasanzwe nkuko byatangajwe n’Ibiro Ntaramakuru by’Abanyamerika (AP).