DIGP Ujeneza yaserukiye u Rwanda  mu nama ya ECCAS i Kinshasa

Umuyobozi Mukuru wungirije ushinzwe imiyoborere n’abakozi muri Polisi y’u Rwanda, (Deputy Inspector General of Police/DIGP) Jeanne Chantal Ujeneza,  yitabiriye inama y’ubukungu yahuje ibihugu byibumbiye mu Muryango w’Ibihugu byo muri Afurika yo Hagati (ECCAS), iyi nama ikaba yarabereye mu Murwa Mukuru Kinshasa, wa Repubulika Iharanira Demokarasi ya Congo (RDC), hagati y’italiki ya 26 na 29 Mata.

Iyi nama yahuje abari mu cyumba cy’inama n’abitabiriye bifashishije ikoranabuhanga, yabereyemo ibiganiro bitandukanye byatanzwe n’abahanga mu by’ubukungu, abayobozi bakuru b’Ingabo na Polisi, n’ibyatanzwe n’Abaminisitiri bo mu bihugu bitandukanye.

Uyu muryango ugizwe n’ibihugu 11, muri iyi nama hakaba harabayeho gusuzuma no kungurana ibitekerezo kuri Politiki n’umutekano muri aka Karere.

Basuzumye kandi imikorere ya Komite zasoje ikivi, habaho no guhuza inyandiko zizagenga Ingabo z’ibihugu bigize Umuryango w’ubukungu w’Afurika yo hagati (FOMAC).

Ni inama yo mu rwego rw’amasezerano avuguruye y’inama y’amahoro n’umutekano mu Karere k’Afurika yo Hagati (COPAX) yemejwe mu kwezi k’Ukuboza 2019.

ECCAS igamije guteza imbere ubushobozi bwo kubungabunga amahoro, ituze, n’umutekano nk’ibishingirwaho by’ingenzi mu iterambere ry’ubukungu n’imibereho myiza y’abaturage b’ibihugu bigize uyu muryango.

Uyu Muryango unafite kandi gahunda yo gushyiraho ifaranga rimwe rihuza ibihugu binyamuryango, guteza imbere umuco w’ibihugu no guharanira ko ibi bihugu byihaza mu bukungu.