Congo-Brazzaville: Byari ibirori bizihiza Umunsi wo Kwibohora 28 (Amafoto)

  • NTAWITONDA JEAN CLAUDE
  • Nyakanga 6, 2022
  • Hashize imyaka 2
Image

Umuryango w’Abanyarwanda baba muri Congo-Brazzaville n’inshuti z’u Rwanda, ku wa Mbere taliki ya 4 Nyakanga 2022 bahuriye mu birori bibereye ijisho byo kwizihiza isabukuru ya 28 yo Kwibohora, bashimira Ingabo za RPA Inkotanyi zakuye Igihugu mu icuraburindi ryatewe n’ubuyobozi bubi.

Ni ibirori byitabiriwe n’abasaga 300 biganjemo Abanyarwanda batuye mu Mujyi wa Brazzaville, inshuti zabo, abagize inzego zitandukanye z’ubuyobozi, abahagarariye ibihugu byabo n’Imiryango mpuzamahanga muri Congo.  

Ambasaderi w’u Rwanda muri Repubulika ya Congo Théoneste Mutsindashyaka, yashimiye abitabiriye uwo muhango by’umwihariko inshuti z’u Rwanda zifatanyije na bo kwishimira iterambere ryagezweho mu Gihugu no mu bubanyi n’amahanga mu myaka 28 ishize.

Yavuze ko ukwibohora nyako k’u Rwanda gushoboka gusa habayeho ubufatanye n’ubutwererane biboneye mu ruhando mpuzamahanga. Yagize ati: “Ni yo mpamvu  u Rwanda rwizera cyane ko ubufatanye bw’ibihugu bikiri mu nzira y’amajyambere, butanga umusaruro ku mpande zose, ari ingenzi mu kugera ku iterambere u Rwanda n’ibihugu by’abavandimwe by’Afurika bikeneye.”

Yavuze ko Ingabo zahoze ari iza RPA Inkotanyi zamaze imyaka ine ziyagoheka, amajoro azira ibitotsi, abatabarika batakaje ubuzima muri urwo rugendo rwo kubohora u Rwanda, byarangiye bageze ku ntsinzi bahagaritse Jenoside yakorerwaga Abatutsi yahitanye abasaga miliyoni mu minsi 100 y’ukwezi kwa Mata kugeza muri Nyakanga 1994.

Yagize ati: “Uyu munsi duha icyubahiro abantu bose bagize uruhare muri urwo rugamba rwo kubohora Igihugu cyacu. Intekerezo zacu nanone zihora ku batanze igitambo kiruta ibindi cy’ubuzima kugira ngo tube tugeze hano turi. Iya 4 Nyakanga mu 1994, ni bwo igice cyijimye kurusha ibindi mu mateka yacu cyasoje, hatangira kubakwa amateka mashya aho Abanyarwanda bahindutse umwe, aho buri wese abaho kandi agakorera mu mutekano n’umutuzo, yishimira kuba afite uburenganzira busesuye.  

Yavuze ko amateka mabi u Rwanda rwanyuzemo ari yo arusunikira gutanga umusanzu wo kubungabunga amahoro mu bihugu by’Afurika no hanze y’uyu mugabane kugira ngo hatazagira ahandi ku Isi ayo mateka yakongera kwisubira.

Yavuze kandi ko muri iyi myaka 28 ishize, u Rwanda rwahindutse kimwe mu bihugu bifite umuvuduko uhambaye mu iterambere ry’ubukungu, icyitegererezo mu kwimakaza uburinganire n’iterambere ry’umugore, ubuyobozi butagira n’umwe buheza, ikoranabuhanga no kubungabunga ibidukikije.  

Yakomeje agira ati: “Mbese, uyu munsi ni uw’ibyishimo, umunezero w’iterambere ridasanzwe ryagezweho mu myaka 28 ishize. Ni ishema kandi ku Banyarwanda bose babaye muri iryo terambere umunsi ku wundi. Ariko u Rwanda ruzirikana ko ukwibohora nyako kubaho gusa mu bufatanye mpuzamahanga.”

Yashimangiye ko ari yo mpamvu u Rwanda na Congo Brazzaville bikomeje kwimakaza umubano mwiza biyobowe n’Abakuru b’Ibihugu byombi Perezida Paul Kagame na mugenzi we Denis Sassou Nguesso.

Yanakomoje ku ruzinduko Perezida Kagame aheruka kugirira i Brazzaville n’ahitwa Oyo mu kwezi kwa Mata uyu mwaka, rushimangira uburyo ibihugu byombi bikomeje guharanira ko umubano bifitanye warushaho kubyazwa umusaruro mu nyungu z’ibihugu byombi.

Muri urwo ruzinduko, hasinywe amasezerano y’ubufatanye mu nzego zitandukanye z’iterambere, harimo ubutwererane mu bya Politiki, ubukungu, ubuhinzi, guhanahana umuco n’ubuhahirane bw’abaturage, kubungabunga ibidukikije, ubufatanye mu bucukuzi no kubungabunga umutungo kamere n’ibindi.

Abitabiriye ibirori basusurikijwe n’itsinda ry’ababyinnyi ry’Inganzo Ngali ryaturutse mu Rwanda. Umugoroba wose wari wuzuye amajwi y’ingoma, indirimbo n’imbyino gakondo, Abanyarwanda bongera kwihuza n’umurage ndetse n’umuco gakondo ubaranga aho bari hose ku Isi.

  • NTAWITONDA JEAN CLAUDE
  • Nyakanga 6, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE