CG Dan Munyuza yatanze kopi z’inyandiko zo guhagararira u Rwanda mu Misiri

  • Imvaho Nshya
  • Ukwakira 30, 2023
  • Hashize amezi 7
Image

Ku gicamunsi cyo ku Cyumweru, Ambasaderi w’u Rwanda mu Misiri CG Dan Munyuza yashyikirije Minisitiri wungirijje w’Ububanyi n’Amahanga wa Misiri Amb. Nabil Habashi, kopi z’inyandiko zimwemerera guhagararira u Rwanda muri icyo gihugu.

Amb. Nabil yahaye ikaze Amb. Munyuza ndetse anifatanya na we mu byishimo byo kuba yarahawe inshingano zo guhagararira u Rwanda mu Misiri.

Abo bayobozi bombi baganiriye ku ngingo zitandukanye z’inyungu ibihugu byombi bihuriyeho, maze Amb. Munyuza afata umwanya wo kwihanganisha Misiri ku bw’impanuka yo mu muhanda yahitanye abantu 32 ku wa Gatandatu tariki ya 28 Ukwakira, ibereye mu muhanda uhuza Cairo n’ubutayu bwa Akexandria.

Amb. Munyuza yagizwe Ambasaderi w’u Rwanda mu Misiri n’Inama y’Abaminisitiri yateranye ku wa 1 Kanama 2023 iyobowe na Perezida wa Repubulika Paul Kagame, asimbuye Ambasaderi Alfred Kalisa wari muri izi nshingano guhera mu 2019.

U Rwanda na Misiri bisanzwe bifitanye umubano urenze uwa politiki. Ni umubano wigaragaza mu nzego zinyuranye uhereye ku rwa politiki, ubukungu, umuco ndetse n’izindi nzego z’iterambere.

Uwo mubano mu bya dipolomasi umaze imyaka myinshi kuko Ambasade ya Misiri mu Rwanda yafunguwe bwa mbere mu 1976, mu gihe iy’u Rwanda i Cairo yongeye gufungurwa muri Werurwe 2015.

Ibihugu byombi bisangiye inyungu zitandukanye haba ku rwego rw’Akarere no ku rwego mpuzamahanga, aho bihurira mu Miryango irimo uw’Ubucuruzi w’Ibihugu by’Iburasirazuba n’Amajyepfo y’Afurika (COMESA) ubifasha kohererezanya ibicuruzwa byagabanyirijwe cyangwa byakuriweho imisoro.  

Ibihugu kandi binahurira mu Muryango muri Gahunda y’Ishami ry’Umuryango w’Afurika Yunze Ubumwe ryita ku Iterambere (NEPAD INITIATIVE), Umuryango w’Afurika Yunze Ubumwe (AU), na Gahunda yo guteza imbere Icyogogo cy’uruzi rwa Nil no mu Muryango w’Abibumbye.

Muri Nzeri 1989 ni bwo hashyizweho Komisiyo ihuriweho yiga ku iterambere ry’umubano w’ibihugu byombi, icyiciro cya kabiri cy’iyo Komisiyo cyahuriye i Cairo ku wa 7 kugeza ku ya 10 Nzeri 2009.

Ubwo iyo Komisiyo ihuriweho yateranaga, hasinywe amasezerano y’ubutwererane mu nzego 10 uhereye ku rw’ubukungu no gusangira ubunararibonye mu buhinzi, ubuzima, ibya gasutamo, iterambere ry’urubyiruko, iry’inganda, ubucuruzi bwa peteroli ndetse n’ubutwererane mu ikoranabuhanga.

Ibindi bishimangira iterambere ry’umubano w’ibihugu byombi byashimangiwe n’uruzinduko rw’akazi Perezida Kagame yagiriye mu Misiri muri Mata 2019, rwaje rukurikira urwa Perezida wa Misiri Abdel Fattah El-Sisi mu Rwanda muri Kanama 2017.

Nanone kandi, Perezida Kagame yagiriye uruzinduko rw’akazi mu Misiri mu mwaka ushize wa 2022, aho yakiriwe na Perezida w’icyo gihugu Abdel Fattah Al-Sisi.

Ambasade y’u Rwanda igaragaza ko mu rwego rwo gukomeza kuzamura iterambere ry’ubukungu bw’ibihugu byombi binyuze mu kwimakaza ubukerarugendo, ubucuruzi n’ishoramari, izakomeza gukorana n’abacuruzi bo ku mpande zombi by’umwihariko Abanyamisiri bagashishikarizwa gushora imari mu mahirwe atagira umupaka agaragara mu Rwanda rw’imisozi igihumbi.

NTAWITONDA JEAN CLAUDE

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE