Basketball: Ikipe y’u Rwanda yaviriyemo muri 1/2 itsinzwe na Nigeria

  • Imvaho Nshya
  • Kanama 4, 2023
  • Hashize amezi 10
Image

Imikino yo guhatanira imyanya (5- 8)

Cameroun 74-37 Guinea 

Uganda 62-88 Mozambique 

Imikino ya 1/2 

Rwanda 48-79 Nigeria 

Senegal 75-65 Mali

Tariki 04-08-2023

Guhatanira imyanya ya 5 na 7

Uganda-Guinea (BK Arena-12h00)

Mozambique-Cameroun (BK Arena-15h00)

Ikipe y’u Rwanda yaviriyemo muri 1/2 cy’irangiza  mu mikino y’Afurika  “FIBA Women Afrobasket 2023” isezerewe na Nigeria iyitsinze amanota 79 kuri 48.

Muri uyu mukino, ikipe ya Nigeria yatsinze uduce tubiri tubanza ku manota 22 kuri 6 na 22 kuri 12. Agace ka gatatu ikipe y’u Rwanda yatsinze  amanota 17 kuri 14 naho agace ka nyuma, Nigeria irakegukana ku manota 21 kuri 13  birangira yegukanye intsinzi ku manota 79 kuri 48.

Mbere y’uyu mukino wa 1/2, Perezida w’u Rwanda Paul Kagame  ari kumwe na Minisitiri wa Siporo “MINISPORTS” , Munyangaju Aurore Mimosa yahuye n’ikipe y’u Rwanda kugira ngo abashimire  uburyo bitwaye bakagera muri 1/2 cy’irangiza muri iyi mikino y’Afurika.

Mu wundi  mukino wa 1/2 wabaye, ikipe ya Senegal yatangiye neza kuko yatsinze imikino yo mu itsinda yitwaye neza ikomeza ku mukino wa nyuma isezereye ikipe ya Mali yakinnye  umukino wa nyuma mu irushanwa ry’Afurika riheruka muri 2021.

Iyi kipe ya Senegal yatsinze Mali amanota 75 kuri 65. Aya makipe yari mu itsinda rimwe C, umukino wari wayahuje, Mali yari yatsinze Senegal amanota 72 kuri 49.

Biteganyijwe ko umukino wa nyuma ndetse n’uwo guhatanira umwanya wa 3 bizaba taliki 05 Kanama 2023 aho ikipe y’u Rwanda izakina na Mali (14h30) mu guhatanira umwanya wa 3 naho ikipe ya Nigeria ikine na Senegal mu guhatanira igikombe (18h00).

Aya makipe yombi, Nigeria na Senegal akaba yabonye itike yo kuzitabira irushanwa ryo gushaka itike y’imikino Olempike izabera i Paris muri 2024.

Mbere y’iyi mikino ya 1/2 habaye imikino yo guhatanira imyanya 5 na 8  yahuje amakipe yaviriyemo muri 1/4 cy’irangiza. Ikipe ya Cameroun  yatsinze Guinea amanota 74 kuri 37 naho Mozambique itsinda Uganda amanota 88 kuri 62.

Kuri uyu wa Gatanu taliki 04 Kanama 2023 hategayijwe imikino yo guhatanira umwanya wa 5 na 7 aho ikipe ya Uganda ikina na Guinea (12h00) mu guhatanira umwanya wa 7 naho Cameroun ikine na Mozambique mu guhatanira umwanya wa 5.

Yanditswe na NYIRANEZA JUDITH

  • Imvaho Nshya
  • Kanama 4, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE