BAL 2022: Ikipe ya REG BBC irakina umukino wa kabiri

SLAC 55-76 US Monastir

CFV Beira 98-92 DUC            

Taliki 09-03-2022

REG BBC-SLAC (Dakar Arena-19h30)

AS Salé-CFV Beira (Dakar Arena-23h00)

Imikino y’amajonjora y’imikino y’Afurika y’amakipe yatwaye ibikombe iwayo muri  Basketball mu bagabo  “Africa Basketball League 2022”  irimo kubera i Dakar muri Senegal irakomeje aho igeze ku munsi wa 4.

Ikipe ya REG BBC ihagarariye u Rwanda nyuma yo kwitwara neza mu mukino wa mbere aho yatsinze  AS Salé yo muri Maroc amanota 91 kuri 87, kuri uyu wa Gatatu taliki 09 Werurwe 2022 irakina umukino wa kabiri aho igomba guhura na SLAC  yo muri Guinea. Uyu mukino urabera muri Dakar Arena saa moya n’igice ku isaha yo mu Rwanda.

Undi mukino uteganyijwe, ikipe ya AS Salé yo muri Maroc irakina na CFV Beira yo muri Mozambique, umukino urabera muri Dakar Arena (23h00).

Mu mikino y’umunsi wa 3 yabaye taliki 08 Werurwe 2022, ikipe ya  US Monastir yo muri Tunisia yatsinze SLAC yo muri Guinea amanota 76 kuri 55 naho CFV Beira yo muri Mozambique itsinda DUC yo muri Senegal amanota 98 kuri 92.

Iyi kipe DUC irimo gukinira mu rugo imaze gutsindwa imikino ibiri kuko ku mukino ubanza wafunguye irushanwa yatsinzwe na SLAC amanota 85 kuri 70.

Iyi mikino y’amajonjora ni iyo mu itsinda rya mbere “Sahara Conference”  rigizwe na  US Monastir (Tunisia) yakinnye umukino wa nyuma  muri  BAL 2021,  AS Salé (Maroc), SLAC (Guinea), DUC (Senegal), Ferroviário da Beira (Mozambique) na REG BBC (Rwanda). Nyuma yo gukina hagati yayo, amakipe 4 ya mbere azakomeza muri ¼.