APR VC yegukanye irushanwa rya Memorial Rutsindura 2026

25 Gicurasi 2026 Saa 17:29

Yanditswe na Micomyiza Barinda Fidele Ku ya 25 Gicurasi 2026 Saa 17:29 Iminota 2 yo gusoma

Ikipe ya APR VC yegukanye irushanwa rya Memorial Rutsindura 2026 nyuma yo gutsinda ikipe ya REG VC amaseti 3-2 mu mukino wa nyuma wabaye ku wa 24 Gicurasi 2026. Ni irushanwa rigamije kwibuka Alphonse Rutsindura wishwe muri Jenoside yakorewe Abatutsi mu 1994. Iri rushanwa rikinwe ku nshuro ya 22 ryasize amakipe ya APR VC na Nyanza TSS begukanye ibikombe mu byiciro by’abakuru n’abato, aho umukino wa nyuma wabaye ku wa 24 Gicurasi 2026.

Kuri iyi nshuro irushanwa ryakinwe mu minsi itatu bitandukanye nuko ryari risanzwe rikinwa mu rwego rwo kongera igihe bitewe n’umubare w’amakipe yitabiriye wazamutse. Muri iki cyiciro cyabagabo bakina nk’ababigize umwuga, ikipe ya Gisagara VC, niyo yegukanye umwanya wa gatatu nyuma yo gutsinda Police VC amaseti 3-2.

Mu cyiciro cy’abato, ikipe ya Nyanza TSS ni yo yegukanye igikombe mu mukino wari ugoye nyuma yo gutsinda ikipe ya Gisagara Academy ku mukino wa nyuma amaseti 3-2 na ho Petit Séminaire Virgo Fidelis itsinda ikipe ya Groupe Scolaire Officiel de Butare ku mukino w’umwanya wa gatatu amaseti 3-1.

Mu cyiciro cy’abagabo bakina mu cyiciro cya kabiri, ikipe ya Keystone ni yo yegukanye igikombe itsinze ikipe ya Winstar naho ikipe ya Catholic University of Rwanda yegukana umwanya wa gatatu.
Mu cyiciro cy’abagore, ikipe ya ESB Kamonyi ni yo yegukanye igikombe itsinze ikipe ya RP Kigali ku mukino wa nyuma amaseti 3-2 naho Lycee de Nyanza yegukana umwanya wa gatatu.

Hari n’ibindi byiciro byakinnye birimo amashuri yisumbuye, icyiciro rusange, amashuri abanza, abakanyujijeho ndetse n’abakina Volleyball yo ku mucanga. Rutsindura Alphonse yavutse mu 1958 ahitwa i Ndora mu Karere ka Gisagara, yiga amashuri yisumbuye muri Seminari nto ya Karubanda, amashuri ya kaminuza ayiga muri IPN Institut Pédagogique National i Butare.

Rutsindura Alphonse yabaye, umwarimu w’umuziki n’ikilatini mu iseminari ya karubanda aba umusifuzi muri Volleyball, aba umutoza w’ikipe ya Seminari kuva 1983 kugeza 1994, aba umutoza mukuru w’ikipe y’igihugu y’abagore 1988 kugeza 1990.

Yanabaye Visi Perezida w’ishyirahamwe ry’umukino wa Volleyball mu Rwanda (FRVB), aba n’umutoza wa Rayon Sports VC mu mwaka wa 1990.