Amakipe ya Handball arimo ayo muri Uganda agiye guhatana mu irushanwa ryo Kwibuka

Amakipe 14 arimo abiri yo muri Uganda agiye guhatanira Irushanwa Mpuzamahanga ryo Kwibuka ku nshuro ya 32 Jenoside yakorewe Abatutsi mu 1994.

Mu gihe u Rwanda ruri mu minsi 100 yo kwibuka abishwe muri Jenoside yakorewe Abatutsi mu 1994, amashyirahamwe atandukanye yateguye imikino igamije guha agaciro abishwe bambuwe.

Kuva ku wa Gatanu tariki ya 5 Kamena kugeza ku Cyumweru, tariki ya 7 Kamena 2026, kuri Petit Stade, UR Remera na Kimisagara hazakinirwa irya Handball mu bagabo no mu bagore.

Ni irushanwa rizahuza amakipe umunani mu bagabo, agabanyijwe mu matsinda abiri, ndetse n’amakipe atandatu mu bagore na yo agabanyije mu matsinda abiri. Amakipe yose azahura hagati yayo mu kurenga amatsinda.

Itsinda rya mbere mu bagabo ririmo Police HC, UR Huye, Ndejje University (Uganda) na SOF naho Itsinda B rigizwe na APR HC, UR Rukara, PEVIC na Blue Tigers.

Mu bagore itsinda rya mbere harimo UR Huye, UR Rukara na Kiziguro SS ni mu gihe Itsinda B rigizwe na Three Stars, Ndajje University na E.SC. Nyamagabe.

Ubwo iri rushanwa riheruka kuba mu 2025, mu bagabo ryegukanywe na Equity HC yo muri Kenya mu gihe mu bagore ryatwawe na Gorilla HC yo mu Rwanda.