Amakipe 28 azakina Igikombe cy’Amahoro 2026 mu bagabo

Ishyirahamwe ry’Umupira w’Amaguru mu Rwanda, FERWAFA, ryatangaje ko amakipe 28 ari yo yemeje ko azitabira Igikombe cy’Amahoro cya 2026.

Ku wa Mbere, tariki ya 15 Ukuboza 2025, ni bwo uru rutonde rwashyizwe hanze rugaragaraho amakipe yo mu cyiciro cya mbere, mu cya kabiri ndetse no mu cya gatatu.

Amakipe yo muri Shampiyona y’u Rwanda y’icyiciro cya mbere azakina iri rushanwa ni Police FC, APR FC, Marine FC, Gasogi United, Rayon Sports, Kiyovu Sports, Musanze FC, Gorilla FC, Mukura VS, Gicumbi FC, Amagaju FC, Bugesera FC, AS Muhanga, Rutsiro FC, AS Kigali na Etincelles FC.

Amakipe yo muri Shampiyona y’icyiciro cya kabiri yiyandikishije ni Intare FC, Nkombo FC, Unity FC, UR FC, Nyanza FC, Vision FC, Motar FC, CITY Boys, LA Jeunnesse na Muhazi United FC. Mu cya gatatu hiyandikishije Imanzi FC na Teleos Arrows.

Uru rutonde ntirugaragaraho amakipe abiri yo mur Sudani ari yo Al Merrikh na Al Hilal SC arimo gukina muri Shampiyona y’u Rwanda, kuko uburenganzira bwazo buzemerera gukina Rwanda Premier League gusa.

Iyi mikino y’Igikombe cy’Amahoro iteganyijwe gutangira mu ntagiriro za Mutarama 2026.

APR FC ni yo ifite igikombe giheruka, yegukanye imaze gutsinda Rayon Sports ibitego 2-0.