Amajyepfo: Abayoboke ba PSD basabwe kwimakaza ihame ry’ubutaryamirana mu bantu

  • Imvaho Nshya
  • Kanama 1, 2022
  • Hashize imyaka 2
Image

Abayoboke b’Ishyaka Riharanira Demokarasi n’Imibereho Myiza y’Abaturage (PSD) mu Ntara y’Amajyepfo, basabwe kwimakaza ihame ry’ubwuzuzanye mu bantu rigamije guha abantu amahirwe angana ku mibereho myiza (Social Justice), nk’uko biri mu murongo mugari w’iri shyaka.

Ibi byagarutsweho mu nama y’Ishyaka rya PSD mu Ntara y’Amajyepfo yabaye kuri iki Cyumweru taliki 31 Nyakanga 2022. Ni inama yabereye mu Karere ka Muhanga aho yitabiriwe n’abari muri Komite ziyobora iri shyaka mu rwego rw’Akarere mu Turere twose 8 tugize Intara y’Amajyepfo, ndetse na bamwe mu bari mu nzego z’iri shyaka ku rwego rw’Igihugu.

Perezida wa PSD mu Ntara y’Amajyepfo, Niyongana Gallican avuga ko iyi nama  ari ibiganiro ubundi bagirana n’Abayoboke b’Ishyaka mu rwego rwo kubongerera ubushobozi, mu buryo bwo kwamamaza Ishyaka ndetse no  gutanga ibitekerezo byabo.

Perezida wa PSD mu Ntara y’Amajyepfo, Niyongana Gallican

Mu biganiro aba bayoboke ba PSD bahawe, harimo icyagarutse ku ihame ry’ubutaryamirana mu bantu (Social Justice). Niyongana Gallican avuga ko  impamvu bahisemo kuganira kuri iyi ngingo ari uko iri mu murongo mugari w’Ishyaka.

Ati: “Ni ikintu PSD ishyira imbere, kandi koko kinagaragarira mu ntego zayo (Ubutabera, Ubwisungane, Amajyambere). Ibyo tubigeraho binyuze muri iryo hame.”

Abayoboye ba PSD ubwo bahabwaga ibiganiro

Iri ni ihame Niyongana avuga ko rikwiye kuranga abayoboke ba PSD aho bari hose.

 Ati: “Iki ni cyo twifuza ku bayoboke bacu kandi ni na cyo tubatuma tuti aho  muri hose, mukorera, ibitekerezo mutanga, ingamba mufata, mujye mukibuka kuko ari cyo Ishyaka ryacu rishyize imbere kandi n’igihugu cyacu cyemera ko ari ihame koko rya ngombwa.”

Mu kuganira kuri iyi ngingo, abayoboke ba PSD bitabiriye iyi nama bavuga ko ari inyungu kuri bo. Tabu Illuminée, usanzwe ari umurezi, yagize ati : “Baradushishikariza gufashanya, umwe akazamura mugenzi we, ntihagire usigara. Nkaba numva rero hari ikintu kinini  nungukiyemo.”

Mugabo Gilbert, usanzwe ari Umuyobozi wungirije w’Akarere ka Muhanga ushinzwe Imibereho myiza y’Abaturage akaba umuyoboke wa PSD na we yagize ati: “Tunishimira uko ibitekerezo bitangwa n’amategeko yacu ubona ko ashyigikira iri hame kandi agenda ashyiramo n’ibyo bitekerezo biba byatanzwe mu nama nk’izi.”

Mugabo Gilbert, Umuyobozi wungirije w’Akarere ka Muhanga ushinzwe Imibereho myiza y’Abaturage

Yongeraho ko amategeko aba ari meza, ko iyo rero ugerageje kuyashyira mu bikorwa n’iri hame riba ririmo.

Abitabiriye  iyi nama ya PSD ku rwego rw’Intara y’Amajyepfo, banaganirijwe kandi ku nshingano n’imyitwarire y’abayoboke b’iri shyaka.

Muri iyi nama hanakozwe amatora yo kuzuza Komite y’Intara, yaburagamo Visi Perezida. Kuri uyu mwanya hatowe Dusabe Denise, usanzwe ari Umuyobozi wungirije w’Akarere ka Gisagara, ushinzwe Imibereho myiza y’Abaturage.

Ishyaka rya PSD ryashinzwe mu 1991. Umwanzuro wa kane mu nama ishinga iri shyaka yabaye taliki 29 Kameza kugeza 01 Nyakanga 1991,ushimangira ko PSD mu byo iharanira harimo n’Ubutaryamirana mu Banyarwanda (Social Justice). Uyu mwanzuro ugira uti : “U Rwanda ni urw’Abanyarwanda bose, aho baherereye hose, ntawukwiye guhezwa ku byiza byarwo.”

  • Imvaho Nshya
  • Kanama 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE