ADEPR yatangije ingando z’abana bakina umupira w’amaguru

  • Imvaho Nshya
  • Kanama 8, 2023
  • Hashize amezi 10
Image

Itorero rya ADEPR mu Rwanda ryatangije ingando z’iminsi itatu ku bana bari munsi y’imyaka 13 y’amavuko bagera kuri 240 bakina umupira w’amaguru mu rwego rwo guteza imbere impano zabo binyuze mu mikino.

Ni igikorwa cyabereye kuri Stade y’Akarere ka Muhanga kuri uyu wa 07 Kanama 2023 cyitabirwa n’abana baturutse hirya no hino mu gihugu baturuka mu madini n’amatorero anyuranye.

Abana 240 bitabiriye izi ngando bagabanyije mu makipe 20 arimo 10 y’abahungu n’andi 10 y’abakobwa. Batoranijwe mu bana 1,080 bari bitabiriye amarushanwa yatangiriye ku rwego rw’Indembo.

Umushumba Mukuru wa ADEPR, Pasiteri Ndayizeye Isaïe, yavuze ko mu gihe cyose bamaze bakora iki gikorwa ahanini cyibanda kwigisha ijambo ry’imana n’ingangaciro zibereye umwana mu muryango.

Ahamya ko hari impinduka zigenda zigaragaza mu mibereho, imikurire n’imyitwarire y’abana bitabira iki gikorwa.

Yagize ati “Mu kubahuza hari impinduka ugenda ubona, kimwe ni ukubakundisha kwiga kuko aho baziye imitsindire yarazamutse.

Ikindi ni gahunda ifasha mu kurwanya ibintu bibajyana mu ngeso mbi nk’ibiyobyabwenge kuko mu nyigisho bahabwa babwirwa ko kugira ngo bazabe abakinnyi b’abahanga bagomba kwirinda ibiyobyabwenge, n’ababashuka”.

Ibi ngo hari ubwo biba inzira zo gukemura ibibazo biri mu miryango ya bamwe mu bana binyuze ku kuba abana babiganirije abatoza babo.

Habyarimana Matiku Marcel, Visi Perezida wa mbere ushinzwe Imiyoborere n’Imari mu Ishyirahamwe ry’Umupira w’amaguru mu Rwanda (FERWAFA), yavuze ko igikorwa nk’iki ari imwe mu nzira yo kubaka umupira no kuvumbura impano bihereye mu bakiri bato.

Yagize ati “Ni gahunda nziza idufasha nkatwe nk’abakurikirana iki gikorwa, aha hahuriye abana barenga 240 birashoboka ko nibura nko mu myaka iri imbere tuzabona abana bakina mu ikipe y’abatarengeje imyaka 17 bashingiye kuri aba.

Tuzabona abana bakina mu ikipe y’abari munsi y’imyaka 20 bashingiye kuri aba bana. Rero iki gikorwa kiraza gufasha abo bana kuzamura izo mpano”.

Umuyobozi w’Umuryango ukora ivugabutumwa ukoresheje umupira w’amaguru, Ambasodors football, Jonathan Henry Ortlip ufatanya na ADEPR muri iki gikorwa yavuze ko uretse kuvumbura impano bahisemo gukorana n’abana bahereye ku myaka y’ingenzi mu buzima bwabo.

Ati “Twahisemo gukorana n’abana. Impamvu yo guhitamo abana ni uko umwana aremwa hagati y’imyaka itandatu na 12 ahabwa amakuru y’ingenzi mu buzima bwe kandi ayo nta yandi ni umupira w’amaguru n’iby’umwuka mu rusengero. Ayo ni amakuru y’ingenzi kuri we”.   

Ni ku nshuro ya 52 igikorwa nk’iki kibaye kikaba kimaze guhuza abana basaga 6,000. Kizasozwa ku wa Gatatu taliki 09 Kanama 2023 hahembwa amakipe ya Mbere ndetse FERWAFA igakomeza gukurikirana impano zigaragaje.

Iyo ingando zirangiye abana bakomeza guhura bakina umupira w’amaguru ndetse bigishwa n’indangagaciro zibafasha gukura neza mu muryango nyarwanda.

Umwe mu misaruro y’iyi gahunda ni uko Ishuri ryisumbuye rya Sumba rya ADEPR ari rimwe mu yigeze kwitabira imikino Mpuzamahanga y’Ibigo by’amashuri (FEASSSA) rihagarariye u Rwanda.

Yanditswe na KAYITARE JEAN PAUL

  • Imvaho Nshya
  • Kanama 8, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE