Abize za kaminuza bavumbuye isoko y’ubukire mu buhinzi n’ubworozi

  • NYIRANEZA JUDITH
  • Ukuboza 6, 2023
  • Hashize amezi 3
Image

Rumwe mu rubyiruko ruriga rwanarangiza kaminuza hakabamo abihangira imirimo bagakora ubuhinzi n’ubworozi hakaba n’abandi bavuga ko babuze akazi, ariko hari abarangije kaminuza bashoboye kwihangira imirimo mu buhinzi n’ubworozi bahamya ko atari imirimo y’abakuze gusa, ahubwo ari isoko y’ubukire.

Basaba bagenzi babo kugira uruhare mu guhanga udushya bakoresheje ikoranabuhanga bagateza imbere ubuhinzi n’ubworozi, bakabikora kinyamwuga hagamijwe kongera umusaruro nk’uko ababugiyemo babuvuga imyato ko bwababereye umuyoboro w’iterambere.

Rwema Diogène Gold, umwe mu bitabiriye ubuhinzi n’ubworozi bishyize hamwe ari batatu nyuma yo kurangiza kaminuza, bagakora kompanyi y’ubworozi bw’inkoko, ubuhinzi bw’imbuto n’imboga yitwa Diosol Ltd ikorera mu Karere ka Kirehe n’aka Kamonyi,  avuga ko urubyiruko rushobora gutungwa n’ubuhinzi n’ubworozi.

Yagize ati: “Turangije kaminuza twabonye nta kazi, dutekereza icyo twakora, twishyira hamwe turi batatu. Twatangiye umugabane wacu ari inguzanyo, twahereye ku bworozi bw’inkoko z’amafaranga 150 000, turakora tugenda tuzamuka, kugeza aho twageze ku bintu bifatika twagura ibikorwa”.

Yongeyeho ati: “Umushinga wo korora inkoko twatangiye tugurira kompanyi zizikora, nyuma tugura imashini izituraga, dushaka abahanga muri byo, ubu dukora n’imashini zirarira tugenda twagura isoko.

Twaje kubona ko harimo andi mahirwe, kubyaza amatotoro ibindi haba ibiryo by’andi matungo, n’amakara yo gucana ndetse n’ifumbire dukora NPK ikoze mu buryo bw’imborera (organique)”.

Rwema yakomeje atangaza ko kuri ubu borora inkoko z’ubwoko bwose, ari izitanga amagi n’inyama, izitanga amagi gusa n’iz’inyama gusa, kandi bakanazoroza abandi ndetse banatanga n’amahugurwa ku bashaka korora bya kinyamwuga.

Ikindi yagarutseho ni uko imibare igaragaza ko umubare w’inkoko ukiri hasi bityo kompanyi zikaba zidashobora guhaza isoko.

Yashimangiye ko gukora ubuhinzi n’ubworozi bidasebye, abibwira ko kwambara neza ari byo biza imbere umuntu akarimba, agasa neza inyuma ariko nta gafaranga.

Ubworozi bw’inkoko buri mu bukomeje gufasha urubyiruko kwiteza imbere

Ati: “Mu buhinzi n’ubworozi ukora wanduye, uri mu gisarubeti na bote, ngatwara moto njya gushaka ibiryo n’imiti, ibyo ndimo ntibikeneye uwambaye kositimu. Ahubwo umuntu arakora akabona amafaranga akarimba igihe cya ngombwa”.

Manirafasha Jean Claude ufite kampani yitwa Bright Future Contracting Company Ltd, mu Murenge wa Nyakariro, mu Karere ka Rwamagana ikora ubuhinzi bw’ikoranabuhanga ku buso buto n’ubunini, umushinga wo kuhira mu buryo bw’ikoranabuhanga byikoresha nta muntu wikoresha hakoreshejwe imirasire y’izuba.

Yagize ati: “Mu zuba uturima tw’igikoni turuma. Nize amasomo ya ‘Electrical engineering’. Ndangije kwiga natekereje uko ibyo nize byagira akamaro no mu buzima busanzwe ntekereza sisitemu yafasha kuhira. […..], nkora akarima k’igikoni nkoresheje imbabari, nshyiraho uburyo bwo kuhira nkabihuza n’Ikigega, pompe ikoresha  imirasire y’izuba”.

Yongeyeho ko iyo mirasire y’izuba, uwo bahaye sisitemu aba ashobora no kuwucana mu buzima busanzwe.

Ari Rwema kimwe na Manirafasha bashishikariza urubyiruko by’umwihariko kumva ko nta muntu atahita akira, ahubwo haherwa ku bushobpozi buke, umuntu akagenda yiyubaka, bityo bagatinyura urubyiruko kujya mu buhinzi n’ubworozi kuko harimo amafaranga, ibiryo bikenewe.

Rwema yagize ati: “Inkoko imwe ikuze ushobora kuyigurisha amafaranga y’u Rwanda 7000 cyangwa 8000, ukazamuka buke gusa ikibazo ni uko ubona abantu bashaka kuzamuka vuba vuba nkatwe twahereye ku nkoko za 150000. twatangiye turi 3, umugabane wacu ari inguzanyo”.

Manirafasha ati: “Urubyiruko rw’uyu munsi rwatungwa n’ubuhinzi n’ubworozi. Amafaranga ari mu buhinzi no ku buso buto birashoboka, wahinga hato bitewe n’ikoranabuhanga bitanga umusaruro, ubuhinzi burimo amafaranga”.

Umuyobozi wungiruje w’Ikigo cy’Igihugu gishinzwe iterambere ry’ubuhinzi n’ubworozi (RAB) Dr. Uwituze Solange, yatangaje ko hakomeje gushyirwa imbaraga mu bworozi bw’amatungo magufi by’umwihariko ubw’inkoko bwa kijyambere kuko ababukoraga kugeza muri Nyakanga 2023 bari 32% by’aborozi b’inkoko bose.

  • NYIRANEZA JUDITH
  • Ukuboza 6, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE