Abimukira ba mbere u Bwongereza buzohereza mu Rwanda bamaze gutegurwa

  • NTAWITONDA JEAN CLAUDE
  • Gicurasi 19, 2022
  • Hashize imyaka 2
Image

Minisitiri w’Ububanyi n’Amahanga n’Ubutwererane w’u Rwanda Dr. Vincent Biruta uri mu ruzinduko I Londres mu Bwongereza, yamenyeshejwe aho gahunda yo kohereza abimukira ba mbere mu Rwanda igeze mu nama yagiranye n’Umunyamabanga wa Leta ushinzwe Polisi, Itangazamakuru no kwakira abinjira mu Bwongereza Priti Patel.

Mu biganioro abo bayobozi bombi bagiranye byibanze ku ishyirwa mu bikorwa ry’amasezerano y’ubufatanye agamije gushyiraho ingamba nshya zo gukemura ikibazo cy’abimukira, Minisitiri Dr. Biruta yabwiwe ko itsinda rya mbere ry’abimukira ryamaze gutegurwa no kumenyeshwa ko rizoherezwa mu Rwanda mu gihe cya vuba.

Priti Patel yijeje ko akomeza kwihutisha gahunda yo kohereza abimukira ba mbere mu Rwanda mu gihe mu minsi ine gusa ishize iki gihugu cyafashe abakabakaba 1000 binjiye mu Bwongereza muburyo bunyuranyije n’amategeko mu minsi ine gusa ishize.

Mu biganiro byahuje abo bayobozi bombi hagaragajwe ko hagati yo ku wa Gatandatu w’icyumweru gishize no ku wa Kabiri w’iki cyumweru, abantu 907 ari bo bafashwe bambukiye mu mazi y’ahitwa Channel.

Minisitiri Patel avuga ko nubwo ubufatanye bw’u Rwanda n’u Bwongereza bwagiye bubangamirwa n’abanyamategeko, ari bwo buzatanga igisubizo kirambye mu rwego rwo guhashya abimukira bakora ingendo zishyira ubuzima bwabo mu kaga bambukira ahitwa Channel mu bwato buto.

Minisitiri Bituta uri i London yagiranye ibiganiro na Priti Patel

Yakomeje avuga ati: “Ntewe ishema n’ubufatanye bwemejwe hagati y’ibihugu byacu byombi, bugamije gusenya uruhererekane rw’abacuruza n’abashimuta abantu no gukumira ibyago byo kubura ubuzima bw’ababurira ubuzima ahitwa Channel mu gihe kizaza, ari na ko tubijyanisha no kurinda abanyantege nke babikwiriye.”

“[…] Dukomeje gushyira imbaraga mu guharanira ko iyi gahunda ya mbere ku Isi ishyirwa mu bikorwa, ikaba igaragaza uburyo mpuzamahanga busabwa kugira ngo duhangane n’bibazo byugarije Isi nk’ikibazo cy’abimukira.”

Yakomeje ashimangira ko mu gihe cya vuba abimukira ba mbere bagiye koherezwa mu Rwanda by’agateganyo kugira ngo ubusabe bwabo bwo guhabwa ubuhungiro bubanze kunozwa.

Imibare itangazwa n’Ikigo cy’Itangazamakuru PA, igaragaza ko kuva uyu mwaka watangira abimukira 8,697 ari bo bageze mu Bwongereza baturutse mu Bufaransa baciye inzira y’amazi.

Uyu mubare urenze uw’ababaruwe mu mwaka wose wa 2020 kuko bo bari 8,466 nk’uko botangazwa n’Ibiro bya Priti Patel.

Imibare iheruka gutangwa na Minisiteri y’Ingabo y’u Bwongereza ari na yo yahawe inshingano zo gucunga umutekano wo mu mazi, igaragaza ko ku wa Kabiri hafashwe abantu 285 bagerageje kwinjira mu gihugu bari mu bwato burindwi, mu gihe ku Cyumweru hari hafashwe 436 bari mu bwato icyenda na ho ku wa Gatandatu hafatwa 167 bari mu bwato 13.

Priti Patel avuga ko bibabaje kubona ba rushimusi bakomeje kwihisha inyuma y’iki kibazo cy’abimukira bakeka ko bagera mu bwongereza banyuze mu nzira zitemewe, bagakomeza ibikorwa byabo byo gucuruza abantu no kwambutsa ibiyobyabwenge

Ati: “Impamvu y’ubufatanye bwacu n’u Rwanda ni uguhagarika abinjira mu gihugu cyacu mu nzira zinyuranyije n’amategeko bakaba nta n’impamvu bafite zo kuba mu gihugu cyacu. Aka kazi karimo gukorwa nonaha… Guverinoma y’u Bwongereza iratanga ubutumwa bw’ingenzi ko turazihanganira abashimuta abantu, ngo turebere ibyaha bikorwa.”

Hagati aho Priti Patel yanijeje ko agiye kwihaniza Ishami ry’Umuryango w’Abibumbye ryita ku Mpuzi (UNHCR) rikareka gukomeza gutesha agaciro ubufatanye bw’u Bwongereza n’u Rwanda mu gushaka umuti urambye w’ikibazo cy’Abimukira no mu bindi bihugu cyaba kigaragaramo byose.

  • NTAWITONDA JEAN CLAUDE
  • Gicurasi 19, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE