Kigali: Abayobozi b’Afurika bakanguriwe kurwanya indwara z’ibyorezo zititabwaho

Abayobozi b’Abanyafurika   mu nzego zitandukanye zirimo Siporo, Ubucuruzi, Ubuhanzi n’Ubuzima  biyemeje gufatanya muri gahunda yo kurwanya  indwara z’ibyorezo zititabwaho “ Neglected Tropical Diseases (NTDs)”.

Ibi byemejwe mu nama yabereye i Kigali taliki 26 Gicurasi 2022 ikaba yari yateguwe na n’Ikigega END na Global First Ladies Alliance (GFLA) iyoborwa na Benny Bonsu, Umuyobozi ushinzwe  amakuru muri Komite mpuzamahanga Olempike  “CIO”.

Minisitiri w’Ubuzima mu Rwanda “MINISANTE”, Dr.  Ngamije Daniel  ni umwe mu bitabiriye  iyi inama hamwe na Aida Muluneh, umuhanzi  akaba n’umufotozi uzwi cyane ku Isi.

Abitabiriye inama baretswe uburyo  ubuyobozi bw’u Rwanda  bwafashe iya mbere mu kurwanya indwara z’ibyorezo zititabwaho “NTDs”. Hanerekanwe kandi  icyegeranyo  cy’amafoto yafashwe na Aida Muluneh  ari kumwe  n’abandi  bafotozi batandatu   bo muri Afurika.

Binyuze mu guhuza ibihangano byiza ndetse n’amafoto, icyegeranyo cyerekana ingaruka mu bijyanye n’imibereho n’ubukugu  biterwa n’izi  ndwara z’ibyorezo zititabwaho “NTDs” ku batuntu ku giti cyabo no ku muryango mugari.

Iyi nama ikaba iri no muri gahunda yo gutegura inama yindi izabera i Kigali ku bijyanye na Malariya n’indwara z’ibyorezo zititabwaho no gutangiza itangazo  rya Kigali “The Kigali Declaration” ryibanda ku gukangurira ibihugu gushyira mu ngiro iyi gahunda yo kurwanya indwara z’ibyorezo zititabwaho aho inzego zose zigomba gufatanya kugira ngo habeho igikorwa cy’igihe  kirekire kandi mu buryo burambye. 

Hari kandi n’inama  y’abakuru b’ibihugu byibumbiye mu muryango w’ibihugu bikoresha ururimi rw’Icyongereza  “CHOGM 2022” izabera mu Rwanda muri Kamena 2022.

Biteganyijwe ko hazareberwa hamwe ibikorwa bigamije kurangiza izi ndwara bitadindije iterambere rya muntu.

Benny Bonsu,  watsindiye ibihembo bitandukanye mu itangazamakru akaba ari  umuyobozi muri CIO ushinzwe ibijyanye no gutanza amakuru  yatangaje ko yishimiye   guhuza aba bayobozi batandukanye  biga ku bijyanye n’indwara z’ibyorezo zititabwaho n’ubuyo  bashobora gushyigikira ibikorwa byo guhangana n’izi ndwara.

Umuyobozi w’Ikigega END ushinzwe ibikorwa  rusange, Oyetola Oduyemi agaragaza ko kurandura  izi  ndwara z’ibyorezo zititabwaho bizasaba inkunga n’uruhare rw’abafatanyabikorwa biyemeje mu nzego zose.  Yakomeje avuga ko hari intambwe ishimishije  yatewe mu gushaka amikoro azafasha mu kurandura burundu izi ndwara, imwe mu ntego bihaye.

Nicole Field Brzeski washinze umuryango Global First Ladies Alliance (GFLA) yavuze ko  ibyo  ubuyobozi bw’u Rwanda  bukora mu kurwanya indwara z’ibyorezo zititabwaho bishimishije kandi  bitanga amasomo ku bandi.

Yashimiye kandi uruhare rwa Madamu Jeannette Kagame  mu guhangana n’iki kibazo n’ubwo haba hari n’ibindi  birimo  amazi n’isuku, uburezi n’ubusumbane bushingiye ku gitsina.  Yakomeje ashimangira ko abafatanyabikorwa babonye  bazagira uruhare mu gukomeza guhangana n’izi ndwara z’ibyorezo zititabwaho.

Muri rusange izi ndwara z’ibyorezo zititabwaho zibasira abantu barenga miliyari 1.7 abenshi bakaba nta mikoro bafite  ndetse batabona ibikenerwa by’ibanze nk’amazi meza n’ibindi.

Izi ndwara zimunga ubukungu kuko hari miliyari z’amadolari zigenda mu bikorwa byo guhangana nazo. Muri gahunda y’itangazo rya Kigali  hemejwe ko muri 2030 izi ndwara zigomba kuba zararangiye.

Ku bijyanye n’ikigega END, cyashyizweho kugira ngo harebwe uburyo indwara z’ibyorezo zititabwaho zarangira.  Iki kigega gifasha muri gahunda yo guhangana n’izi ndwara aho cyorohereza ubufatanye n’abikorera, Leta n’abandi bafatanyabikorwa.

Kuva muri 2012, hamwe n’abafatanyabikorwa, ikigega END cyatanze imiti irenga miliyari imwe mu bihugu 31, abasaga ibihumbi 43 mu rwego rwo gukumira ubumuga bwo kutabona  babazwe amaso ndetse hanahugurwa  abakozi bashinzwe ubuzima bagera kuri miliyoni 3,5 kugira ngo bamenye kuvura  indwara z’ibyorezo zititabwaho.

Ihuriro “Global First Ladies Alliance”  rihuza abagore baturuka  mu bihugu birenga 40 byo muri Afurika, Amerika y’Amajyepfo, USA no mu Bwongereza  aho bashyize imbere ubufatanye bufatika n’ingamba zo guteza imbere abagore n’ abaturage muri rusange.