Abasaga 3,000 binjiye muri FARDC babeshywe ko umwanzi bahanganye ari u Rwanda

  • NTAWITONDA JEAN CLAUDE
  • Ugushyingo 8, 2022
  • Hashize umwaka 1
Image

“Dukwiye kumenya ko nta wundi uretse twe tugomba gutabara Igihugu cyacu, kandi ibyo bisaba ko buri wese akora ubukangurambaga ahamuzengurutse.”

Ubwo butumwa bwatanzwe na Perezida wa Repubulika Iharanira Demokarasi ya Congo Félix Antoine Tshisekedi Tshilombo, ubwo yahamagariraga abaturage b’Igihugu ayoboye gushishikarira kurwanya “ibitero by’u Rwanda ku butaka bwa Teritwari ya Rutshuru.”

Ibitero yavugaga ko ari iby’u Rwanda kuri radiyo na televiziyo bya Leta (RTNC) ni iby’inyeshyamba za M23 zimaze kwigarurira ibice bitandukanye by’Intara ya Kivu y’Amajyaruguru, bityo kuba Ingabo za Leta zitarabasha kuzitsimbura bikaba igisobanuro gishingirwaho ko zifashwa n’u Rwanda.

Mu bukangurambaga bwo kurwanya ibyo bitero bita iby’u Rwanda, Ubuyobozi bw’Ingabo za RDC (FARDC) bwemeje ko kugeza ku wa Mbere taliki ya 7 Ugushyingo, habarurwaga urubyiruko rusaga 3,000 rwinjiye mu gisirikare rugamije kurwanya inyeshyamba za M23.

Bimwe mu byo urwo rubyiruko rurimo gutozwa ni ukuzirikana ko izo nyeshyamba zateye zivuye mu Rwanda, ikinyoma gifatwa nk’urwitwazo rwa Guverinoma ya RDC rwo guhunga ibibazo by’umutekano muke mu Ntara ya Kivu ya Ruguru ivugwamo imitwe yitwaje intwaro igera ku 130.

Umuvugizi w’Ingabo za FARDC mu Ntara ya Kivu ya Ruguru Lt. Gen. Guillaume Djike Kaiko, ni we wemeje ko abasaga 3,000 bateye intambwe yo kwinjira mu ngabo bagamije guhangana na M23.

Muri bo harimo Clarisse Mahamba w’imyaka 19 y’amavuko, wabwiye itangazamakuru ko yakunze igisirikare kuva mu bwana bwe. Yongeyeho ko icyamuteye kwinjira mu gisirikare ari ukugira ngo ahangane n’Abanyarwanda bakomeje kwigabiza Igihugu cye.

Yagize ati: “Ndabona ko ibintu bitarimo kugenda neza mu gihugu cyacu. Nabonye Abanyarwanda baza kudutera kubera ko icyo gihe nari i Rumangabo. Niboneye uburyo abasirikare bacu barimo kubabara. Narahunze ariko ni yo mpamvu nanjye nashatse kwinjira mu gisirikare.”

Edison Butsira w’imyaka 27 na we ari mu binjiye mu Ngabo za FARDC aretse akazi yakoraga nk’uwarangije icyiciro cya kabiri cya kaminuza mu icungamutungo. Yavuze ko we icyamuteye kwinjira mu Ntambara ari uko yarebeye ku rubyiruko rwo muri Ukraine uburyo rwitangiye gutabara Igihugu cyarwo ruhangana n’u Burusiya.

Ati: “Urubyiruko rwahisemo kureka ibyo rwakoraga, rwahise rwinjira mu Ngabo kuko Ukraine yari yatewe. Aha najye naretse akazi nifatanya n’inshuti zanjye z’abasirikare mu kurwanira Igihugu cyacu.”

RDC yiteze kunesha inyeshyamba za M23 yinjiza urubyiruko rwinshi mu gisirikare

Impuguke mu bya Politiki zivuga ko ukurikije uburyo urwo rubyiruko rusobanura impamvu rwinjiye mu gisirikare, birasa nk’aho mu mitwe yarwo rugiye guhangana n’u Rwanda i Rutshuru kandi rugiye gukozanyaho n’abavandimwe b’Abanyekongo.

Umubano w’u Rwanda na RDC umaze imyaka irenga 25 uzanwamo agatotsi n’ibibazo bishingiye ku mateka y’imiyoborere yaranze ibihugu byombi mbere ya Jenoside yakorewe Abatutsi mu 1994.

Impuguke mu mateka ya Politiki z’ibihugu byombi zemeza ko, kubera umubano mwiza Abakuru b’Ibihugu byombi bari bafitanye Jenoside yakorerwaga Abatutsi imaze guhagarikwa bamwe mu bari abayobozi n’abandi bayikoze bahungiye muri RDC bafite icyizere cyo kuzagaruka gusohoza umugambi wabo wo kumara Abatutsi.

Nyuma y’igihe gito ni bwo bamwe muri abo basize bakoze Jenoside,  bashinze umutwe w’iterabwoba wa FDLR udahwema kugerageza guhungabanya umutekano w’u Rwanda kugeza n’uyu munsi aho uwo murage wahererekanyijwe no mu rubyaro rwabo rwavukiye mu mashyamba ya RDC.

Binavugwa kandi ko mu myaka uwo mutwe wamaze muri Kivu ya Ruguru, wimakaje ingengabitekerezo ya Jenoside mu Banyekongo ikaba imwe mu mbarutso zatumye havuka umutwe wa M23 mu rwego rwo gutabara Abanyekongo bavuga Ikinyarwanda cyane cyane abo mu bwoko bw’Abatutsi.

Guverinoma y’u Rwanda ikomeje kwikoma RDC ishinja Igihugu cy’abaturanyi gushyigikira umutwe witwaje intwaro itagaragaza ibimenyetso, hakiyongeraho ubushotoranyi burimo kuroha ibisasu ku butaka bw’u Rwanda no kuvogera ikirere cyarwo nk’uko byagenze ku wa Mbere ubwo indege y’intambara yarengaga umupaka ikanagwa ku kibuga cy’indege cya Rubavu umwanya mutoya.

Inyeshyamba za M23 zatangiye kuvugwa cyane  mu myaka irenga 10 ishize ubwo zafataga Umujyi wa Goma uhana imbibi n’u Rwanda ariko zikaza gutsimburwa na FARDC, zabura aho zerekeza zigahungira mu Rwanda.

U Rwanda rwambuye intwaro runacumbikira abaruhungiyemo kure y’umupaka, ndetse rukomeza gukorana na Leta ya RDC harebwa uburyo bafashwa gutahuka bagasubizwa mu buzima busanzwe.

Bivugwa ko mu gihe inyeshyamba za M23 zari zikiri mu buhungiro, ari bwo abasigaye mu gihugu batabonaga impinduka bongeye gushibukamo uyu mutwe wazanye ubukana bwinshi, bwatumye Loni yemeza ko ufite ubushobozi bw’ingabo zemewe.

  • NTAWITONDA JEAN CLAUDE
  • Ugushyingo 8, 2022
  • Hashize umwaka 1
TANGA IGITEKEREZO
Toro says:
Ugushyingo 8, 2022 at 2:29 pm

Barabashuka baohera bapfe abanyaporotike nibibwa mbe kuki batohereza abana babo mbe kuki bo bataja kurugamba

Andika igitekerezo

AMATEGEKO AGENGA IYANDIKA RY'IGITEKEREZO CYAWE