Abanyarwanda biganje mu buyobozi bw’ubutumwa bwa Loni muri CAR

  • NTAWITONDA JEAN CLAUDE
  • Gashyantare 24, 2022
  • Hashize imyaka 2
Image

Umunyamabanga Mukuru w’Umuryango w’Abibumbye António Guterres, yemeje Amb. Rugwabiza Valentine nk’Intumwa ye yihariye muri Repubulika ya Santarafurika, akaba asanze abandi bayobozi batandukanye b’Abanyarwanda mu butumwa bw’uwo muryango muri icyo Gihugu.

Itangazo ryatanzwe ku mugoroba wo ku wa Gatatu, ryemeje ko Amb. Rugwabiza azaba ari n’Umuyobozi w’Ubutumwa bw’Umuryango w’Abibumbye bwo kubungabunga amahoro muri icyo Gihugu (MINUSCA), akaba yasimbuye kuri izo nshingano Mankeur Ndiaye.  

Kwemeza uyu Munyarwandakazi ufite ubunararibonye buhambaye muri Politiki mpuzamahanga, bitumye u Rwanda rwiharira ubuyobozi bw’ubutumwa bwa Loni muri icyo Gihugu, cyane ko guhera muri Kamena umwaka ushize Polisi iri muri ubwo butumwa iyoborwa na CP Christophe Bizimungu na we yafashe izo nshingano asimbuye Umufaransa Pascal Champion.

Ni mu gihe kandi ishami rishinzwe guhuza ibikorwa by’ubutabazi riyoborwa n’Umunyarwanda Vedaste Kalima guhera muri Mutarama 2021.

Ku rundi ruhande Umugaba w’Ingabo ziri muri ubwo butumwa bwa Loni ni Lt. Gen. Daniel Sidiki Traoré wo muri Burkina Faso, mu gihe abazaba bungirije Amb. Rugwabiza ari Lizbeth Cullitwo na Denise Brown bakomoka muri Leta Zunze Ubumwe z’Amerika (USA)

António Guterres yashimiye Umurimo ukomeye Ndiaye usimbuwe mu buyobozi bwa Loni muri CAR n’umusanzu yatanze ku baturage ba Santarafurika mu bihe byari bigoye kuva mu mwaka wa 2019, ubuyobozi bwe bukaba bwaragize umumaro ukomeye mu ruhare rwa MINUSCA mu guharanira ko amatora akorwa mu mutuzo.

Ku rundi ruhande itangazo rikomeza rishimangira ko Rugwabiza yakoze ishingano zitandukanye muri Afurika mu gihe kirenga imyaka 30, zirimo gukora muri Guverinoma, nk’umudipolomate mu Gihugu, mu Karere no mu ruhando mpuzamahanga.

Ku wa Gatatu taliki ya 23 Amb. Rugwabiza yahuye na Guterres amusezeraho, mu gihe ari mu myiteguro yo kwerekeza i Bangui mu ntangiriro za Werurwe 2022.

Mu butumwa yanyujije ku mbuga nkoranyambaga, Amb. Rugwabiza yagize ati:  “Nasezeye ku Munyamabanga Mukuru wa Loni mu gihe ndimo gusoza inshingano nk’Ambasaderi Uhoraho w’u Rwanda muri Loni. Nashimye umubano uzira amakemwa urangwa hagati y’u Rwanda na Loni kandi ngaragaza ko u Rwanda ruzakomeza gushyigikira ibikorwa by’uwo muryango byo kubungabunga no kubaka amahoro ndetse no gushyigikira inkingi z’iterambere zishyirwaho n’uwo muryango.”

Guhera mu 2014, u Rwanda rwohereza abasirikare, abapolisi n’abasivili  muri MINUSCA aho kuri ubu ari na cyo gihugu kigira uruhare runini muri ubwo butumwa, hagakurikiraho Pkistan na Bangladesh.

Imibare ya vuba igaragaza ko mu Gushyingo 2021, u Rwanda rwohereje abasirikare 1,660 n’abapolisi 459 ndetse mu byumweru bike biri imbere hitezwe abandi basirikare bashya 250. Abasirikare n’Abapolisi baturuka mu Rwanda ni na bo barinda Umukuru w’igihugu, Abagize Guverinoma n’abandi banyacyubahiro muri Santarafurika.

Amb. Rugwabiza ahawe inshingano muri Repubulika ya Santarafurika mu gihe icyo gihugu kikiri mu bibazo by’umutekano muke.

Mankeur Ndiaye yasimbuye aheruka kubwira Akanama gashinzwe Umutekano ka Loni ko anenga ihonyorwa ry’uburenganzira bwa muntu ndetse n’amategeko mpuzamahanga bikomeje gukorwa n’impande zose zihuriye mu ntambara ya Santarafurika.

Bimwe mu bibazo yagaragaje harimo gukoresha imbaraga z’umurengera n’ubuyobozi ku miryango imwe n’imwe, ihohoterwa rishingiye ku gitsina no guhohotera abana, kubakoresha imirimo ivunanye no kubinjiza mu bikorwa bya gisirikare bikorwa n’imitwe yitwaje intwaro.

Yasabye ko hakwiye gukorwa iperereza ryimbitse kugira ngo imitwe ibikora izagezwe imbere y’ubutabera, ariko anaboneraho kuvuga ko hari intambwe ikomeye imaze guterwa ku kugarura amahoro muri icyo Gihugu.

Amb. Rugwabiza wamusimbuye asigiwe inshingano zo gukomeza gushyigikira urugendo rwo gufungura amarembo ya Politiki hagamijwe guhanaguraho urwikekwe no kubaka ubwizerane n’ubworoherane.

Intambwe imaze guterwa yatumye abahagarariye imitwe yitwaje intwaro bemera guhagararirwa muri Komite itegura ibiganiro no guharanira ko abaturage b’icyo gihugu barinzwe.  

Amb. Rugwabiza wari ahagarariye inyungu z’u Rwanda muri Loni akaba n’Ambasaderi wa rwo muri Colombia na Jamaica yasimbuwe n’Amb. Claver Gatete wari Minisitiri w’Ibikorwa Remezo.

Kuva mu 2014 kugeza mu 2016, Amb. Rugwabiza yabaye Minisitiri w’Umuryango w’Afurika y’Iburasirazuba akaba n’umwe mu bagize Inteko Ishinga Amategeko y’uwo muryango.

Hagati ya 2013 na 20114, Amb Rugwabiza yabaye Umuyobozi Mukuru w’Urwego rushinzwe Itrambere mu Rwanda (RDB) n’umwe mu bagize Guverinoma y’u Rwanda.

Guhera mu 2005 kugeza mu 2013, Amb Rugwabiza yabaye Umuyobozi Mukuru wungirije w’Umuryango Mpuzamahanga w’Ubucuruzi (WTO) i Geneva. Mbere yaho yakoze nk’Ambasaderi Uhoraho w’u Rwanda mu Muryango w’Abibumbye mu biro by’i Geneva no mu bigo byihariye by’Umuryango w’Abibumbye.

Hagati y’umwaka wa 2000 n’uwa 2005 yabaye Ambasaderi wihariye w’u Rwanda mu Busuwisi. Uyu mudamu uzobereye ibya dipolomasi na Politiki mpuzamahanga avuga indimi enye ari zo Icyongereza, Igifaransa, Igiswahili n’Ikinyarwanda.  

  • NTAWITONDA JEAN CLAUDE
  • Gashyantare 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE