Abahatanira gusimbura Boris Johnson bashyigikiye kohereza abimukira mu Rwanda

  • NTAWITONDA JEAN CLAUDE
  • Nyakanga 24, 2022
  • Hashize imyaka 2
Image

Rishi Sunak na Liz Truss bari mu bakomeje guhatanira gusimbura Boris Johnson ku mwanya w’ubuyobozi bw’ishyaka riri ku butegetsi no ku mwanya wa Minisitiri w’Intebe w’u Bwongereza, bashimangiye ko nibaramuka binjiye mu nshingano bazongera imbaraga mu guharanira kwagura ubufatanye bw’u Rwanda n’u Bwongereza mu gukemura ikibazo cy’abimukira.

Bombi bahamije ko gahunda y’ubufatanye bw’u Bwongereza n’u Rwanda ari nziza kandi izira amakemwa, ari na yo mpamvu biyemeje kuyishyigikira ndetse no kurushaho kwagura ayo masezerano no mu bindi bihugu byiteguye gufatanya n’u Bwongereza mu guhangana n’ibibazo cy’abimukira.

Sunak yavuze ko azakora ibishoboka byose kugira ngo iyo gahunda yadindiye ishyirwe mu ngiro mu Rwanda ndetse n’ibindi bihugu bifite ubushake bwo gukorana n’u Bwongereza mu guhangana n’ikibazo cy’abimukira badakurikiza amategeko kimaze imyaka n’imyaka cyaraburiwe umuti ku Isi.

Sunak yashimangiye ko mu gihe u Bwongereza butarabasha kugenzura imipaka ku rwego rwa 100% kohereza mu Rwanda, abimukira binjiye mu gihugu mu buryo bunyuranyije n’amategeko bikwiye kugirwa ihame.

Madamu Truss na we yavuze ko yiyemeje guharanira ko ubufatanye bw’u Bwongereza n’u Rwanda bushyirwa mu bikorwa mu buryo bwuzuye, aniyemeza kuba umuhuza wa Leta n’Urukiko rw’u Burayi ruharanira uburenganzira bwa Muntu kugira ngo rutazongera kujya rwivanga mu byemezo bya Leta byashyiriweho gushaka umuti ku bibazo by’Igihugu.

Madamu Truss yavuze ko naramuka abaye Minisitiri w’Intebe w’u Bwongereza imbaraga zishyirwa mu kurinda imipaka  y’u Bwongereza zizongerwa ku kigero cya 20% mu rwego rwo kongerera imbaraga abacunga umutekano mu mazi y’ahitwa Channe babuza ubwato buto kwambukana abimukira baturutse mu Bufaransa.

Yagize ati: “Nzaharanira ko tugira umubare ushyitse w’inzego z’umutekano ku mipaka n’ubushobozi buhagije mu kurinda ubusugire bw’Igihugu.”

Nubwo abayobozi biyamamariza kuba ba Minisitiri b’Intebe bashyigikiye iyi gahunda, imiryango itegamiye kuri Leta itandukanye irimo n’Ishami ry’Umuryango w’Abibumbye ryita ku Mpunzi (UNHCR) ntiyumva impanvu u Bwongereza bwafashe icyemezo cyo kwikuraho ishingano zo kwakira impunzi.

Hari abavuga ko iyo gahunda irimo kutagira umutima wa kimuntu wo gutabara abari mu kaga, nubwo u Bwongereza bwo bushimangira ko abazoherezwa mu Rwanda bitavuze ko bazaba birukanywe kuko ubusabe bw’ubuhunzi buzaba burimo kugenzurwa kugira ngo bwemerwe binyuze mu nzira zemewe.

Ibyo bizafasha ko abakirwa mu Bwongereza ari abakeneye ubuhungiro by’ukuri, aho kugira ngo bujye buhabwa abafite ubushobozi bwo kwishyura akayabo ababambutsa mu bwato buto cyangwa mu makamyo.

  • NTAWITONDA JEAN CLAUDE
  • Nyakanga 24, 2022
  • Hashize imyaka 2
TANGA IGITEKEREZO
Thanks says:
Nyakanga 24, 2022 at 4:33 pm

Ngo bashigikiye? Iki si ikinyarwanda pe igihekane SHY kirazimye karabaye ubwo abanyamakuru musigaye mwigana ubusirimu mugahindura imyandikire mwari kwandika bashyigikiye aho kwandika bashigikiye

Andika igitekerezo

AMATEGEKO AGENGA IYANDIKA RY'IGITEKEREZO CYAWE