Minisitiri Ngabitsinze yakiriye Ambasaderi wa Pakistan mu Rwanda

Ku gicamunsi cy’ejo ku wa Kabiri tariki 31 Ukwakira 2023, Minisitiri w’Ubucuruzi n’Inganda Dr Ngabitsinze Jean Chrysostome, yakiriye mu biro bye Amb. Naeem Ullah Khan wa Pakistan mu Rwanda.

Minisiteri y’Ubucuruzi n’Inganda (MINICOM) yatangaje ko impande zombi zaganiriye ku mahirwe atandukanye agaragara mu ishoramari ibihugu byombi bishobora kungukiramo.

U Rwanda na Pakistan bisanzwe bifitanye imikoranire n’ubuhahirane, binyuze mu masezerano y’ubufatanye mu bijyanye n’ubuvuzi n’umutekano.

Amb. Naeem Ullah Khan mu kwezi kwa Nzeri uyu mwaka, yavuze ko agiye gushyira imbaraga mu gushaka izindi nzego ibihugu byombi byakoranamo, harimo ubucuruzi n’ishoramari.

Yavuze ko bimwe mu bizakorwa hagati y’ibihugu byombi ari uguhuza abagemura icyayi cy’u Rwanda mu mahanga, bakajya bakivana mu Rwanda bakigeza muri Pakistan.

Ku masezerano mu by’ubuzima, Amb Naeem yavuze ko bateganya kujyana Abaforomo n’abaganga bo mu Rwanda, bakajya kwiga muri Pakistan.

KAYITARE JEAN PAUL