Basketball: Nigeria yegukanye igikombe cy’Afurika ku nshuro ya kane yikurikiranya

Rwanda 51-89 Mali

Nigeria 84-74 Senegal

Kuva tariki 28 Nyakanga  kugeza 05 Kanama  2023  muri BK Arena habereye imikino y’Afurika mu mukino wa Basketball mu  bagore “FIBA Women Afrobasket 2023”.

Ikipe y’igihugu ya Nigeria yitwaye neza yegukana igikombe  akaba ari ku nshuro ya kane icyegukanye yikurikiranya.

Iyi mikino yari yitabiriwe n’amakipe 12 aho yashyizwe  mu matsinda 4. Itsinda A ryari rigizwe n’u Rwanda, Angola na Cote d’Ivoire.  Itsinda B rigizwe na Cameroun, Guinea na Mozambique. Itsida C rigizwe na Mali, Senegal na Uganda naho itsinda D rigizwe na Nigeria, Misiri na RDC.

Ikipe ya Nigeria  na Senegal ni zo zakinnye umukino wa nyuma aho Nigeria  yatsinze amanota 84 kuri 74.

Mbere y’uyu  mukino wa nyuma, ikipe ya Mali  yatsinze ikipe y’u Rwanda amanota 89 kuri 51 mu guhatanira umwanya wa gatatu.

Iyi kipe  y’u Rwanda yaviriyemo muri 1/2 cy’irangiza  itsinzwe na Nigeria amanota 79 kuri 48 naho Senegal isezerera Mali  ku  manota 75 kuri 65.

Ikipe ya Nigeria  ni inshuro ya  6 yegukanye igikombe cy’Afurika akaba ari inshuro ya 4 yikurikiranya (2003, 2005, 2017, 2019, 2021 na 2022). Kuva 2017 imaze ikina imikino y’Afurika 23 ntabwo iratsindwa.

Uko amakipe yakurikiranye

Ikipe ya Nigeria ni yo yegukanye umwanya wa mbere ikurikirwa na Senegal (2), Mali (3), u Rwanda (4), Mozambique  (5), Cameroun (6), Uganda (7), Guinea (8),Angola (9), Misiri (10),Cote d’Ivoire (11) na RDC (12).

Ikipe ya Nigeria na Senegal zabonye itike yo kuzitabira imikino y’Afurika yo gushaka itike y’imikino Olempike izabera i Paris muri 2024.

Imikino y’Afurika itaha izaba muri 2025 aho amakipe 4  ya mbere (Nigeria, Senegal, Mali n’u Rwanda) azaba afite itike akaba atazakina imikino yo gushaka itike muri za Zone.