Basketball: u Rwanda rwongerewe  amasezerano y’imyaka 5 yo kwakira imikino ya BAL

Kuva muri 2021 hatangiye gukinwa mu buryo bushya  irushanwa  ry’amakipe yatwaye ibikombe iwayo muri Basketball mu bagabo muri Afurika “Basketball Africa League (BAL 2023)”.

Binyuze mu Rwego rw’Igihugu rw’Iterambere “RDB” ndetse  na Sosiyete Nyarwanda ikora ubwikorezi bwo mu Kirere “RwandAir”, ubuyobozi bwa BAL bwasinye amasezerano y’ubufatanye aho u Rwanda rwahawe kwakira imikino ya  ya   BAL, guhera kuri ¼ kugeza ku mukino wa nyuma.

Nyuma y’imikino yabaye ku nshuro ya mbere muri 2021, 2022 ndetse n’iya 2023, taliki 19 Kamena 2023,  ubuyobozi bwa BAL, RDB na RwandAir  bwongeye gusinya amasezerano y’ubafatanye azamara imyaka 5  akazasozwa muri 2028.

Muri aya amasezerano harimo ko u Rwanda ruzakira imikino ya nyuma ya BAL 2024, 2026  na 2028. Muri 2025 na 2027, u Rwanda ruzakira imikino y’amajonjora “Conference” aho izabera muri BK Arena.

Ubwo BAL yakinwaga bwa mbere, ikipe ya Zamalek yo mu Misiri ni yo yegukanye igikombe itsinze US Monastir  yo mu Misiri amanota 76 kuri 63. Icyo gihe ikipe yari ihagarariye u Rwanda, Patriots BBC yasoreje ku mwanya wa 4.

Muri 2022, ikipe ya US Monastir yo muri Tunisia yegukanye igikombe itsinze Petro de Luanda yo muri Angola amanota 82 kuri 72. Ikipe ya REG BBC yari ihagarariye u Rwanda yaviriyemo muri ¼.

Muri 2023, ikipe ya Al Ahly yo mu Misiri ni yo yegukanye igikombe itsinze AS Douanes yo muri Senegal amanota 80 kuri 65. Ikipe ya REG BBC yari ihagarariye u Rwanda na bwo yongeye kuviramo muri ¼.