Ikigo cy’Igihugu gishinzwe Kugenzura Ibiribwa n’Imiti (Rwanda FDA) cyatangiye guhaha ubumenyi mu bigo by’i Burayi bishinzwe ubugenzuzi kugira ngo imiti n’inkingo bikorerwa mu Rwanda bizabe bishobora kugurishwa no ku isoko mpuzamahanga.
Umuryango w’Ubumwe bw’u Burayi (EU) watangije umushinga wunganita u Rwanda mu gihe rukomeje imyuteguro yo gukora imiti n’inkingo byujuje ubuziranenge bizagira uruhare rukomeye mu kuziba icyuho ku Mugabane w’Afurika n’ibindi bice bitandukanye ku Isi.
Kuri uyu wa Kabiri taliki ya 16 Gicurasi, ni bwo hatangijwe umushinga ugamije gufasha Rwanda FDA kunoza ibikorwa byayo by’ubugenzuzi bw’imiti, ibiribwa n’inkingo mu kurushaho guharanira ubuziranenge mpuzamahanga n’umutekano w’abaturage.
Umunyamabanga wa Leta muri Minisiteri y’Ubuzima Dr Yvan Butera, yagize ati: “Turimo turakora kugira ngo imiti izajya ikorerwa ahangaha izabe yujuje ubuziranenge. Ni na byo uyu mushinga uzakora cyane cyane kugira ngo ari ugupima iyo miti uburyo izaba yujuje ubuziranenge, kugira ngo Laboratwari zacu zizabe zifite ubushobozi bwo ku rwego mpuzamahanga.”
Yakomeje agaragaza ko kimwe mu bikubiye muri ubwo bufatanye harimo kuba ibigo bishinzwe ubugenzuzi bw’imiti bizakorana na Rwanda FDA mu kunoza ibisabwa byose kugira ngo imiti n’inkingo bikorerwa mu Rwanda bizabe byujuje ibisabwa ku rwego mpuzamahanga.
U Rwanda rwasinyanye amasezerano y’ubufatanye n’Umuryango w’Ubumwe bw’u Burayi (EU) muri Kamena umwaka ushize, ariko atangira gushyirwa mu bikorwa ryatangiye mu kwezi k’Ukwakira, Umuryango w’Ubumwe bw’u Burayi ukaba warashoyemo miliyoni 2 z’Amayero, asaga miliyari ebyiri z’amafaranga y’u Rwanda.
Dr. Butera yavuze ko uyu mushinga uzakomeza kugeza igihe u Rwanda ruzaba rwiteguye gukora kinyamwuga.
Ati: “Ni ukugira ngo turengere ubuzima bw’Abanyarwanda kugira ngo babashe kubaho neza, babashe gukora, guteza imbere Igihugu cyabo, akaba ari urwego rw’ubuzima ariko iyo uteje imbere uru rwego n’Igihugu muri rusange gitera imbere.”
Uyu mushinga ushyirwa mu bikorwa n’Ikigo cy’Ubutwererane mu bya Tekiniki (Expertise France) hamwe n’ibigo bishinzwe iterambere ry’ubuzima mu bihugu by’i Burayi byitezweho gusangiza u Rwanda ubunararibonye bwabyo.
Umuhango wo gufungura uyu mushinga witabiriwe n’abafatanyabikorwa banyuranye mu rwego rw’ubuzima harimo abahagarariye Guverinoma, inganda zikora imiti, sosiyete sivile n’abafatanyabikorwa mu iterambere.
Uyu mushinga witezweho kongerera Rwanda FDA imbaraga mu bugenzuzi ikora, kunoza serivisi za Laboratwari, kongera ubushobozi mu gusesengura ibyago byaturuka ku miti n’inkingo, no kwimakaza ubuziranenge n’imikorere izira amakemwa.
Muri uyu mushinga u Rwanda ruzakorana n’ibigo by’ubugenzuzi biturutse mu bihugu bya EU nk’Ikigo cy’Ubufaransa gishinzwe ubuziranenge bw’imiti n’ibikoresho by’ubuvuzi (ANSM), Ikigo Paul-Ehrlich-Institut, Ikigo German Federal Institute for Vaccines and Biomedicines, Sciensano yo mu Bubiligi na State Medicines Control Agency ya Lithuania.
Ambasaderi wa EU mu Rwanda Belén Calvo Uyarra, yashimangiye ko uyu mushinga ufite ibyiciro birimo kunoza uburyo bw’amategeko bifite aho bihurira n’ibikoresho by’ubuzima, gukurikirana ibikenewe ku isoko no gushyigikira ishyirwaho ry’ibirango byemewe ku rwego mpuzamahanga.
Yavuze ko miliyoni 2 z’Amayero zizakoreshwa mu gihe cy’imyaka ibiri, Rwanda FDA ikazohererezwa impuguke zirenga 200 zizajya zisangiza ubunararibonye abakozi bayo.
