Julián Martínez Alman yagizwe Umutoza Mukuru wa APR WBBC

Umunya-Espagne, Julián Martínez Alman, yagizwe Umutoza Mukuru wa APR WBBC, asimbura Mushumba Charles wari muri izo nshingano kuva muri Nzeri 2024.

Ni amakuru yatangajwe n’iyi kipe mu ijoro ryo ku wa Kane, tariki ya 8 Ukwakira 2026, binyuze ku mbuga nkoranyambaga zayo.

Yagize iti: “APR Women Basketball Club yishimiye kwakira Julián Alman Martínez mu batoza mbere y’imikino ya AWBL Zone 5 Qualifiers.

Ubunararibonye bwe n’igihe yamaze muri Sosiyete y’u Rwanda ishinzwe Ingufu, Julián azanye ubumenyi budasanzwe mu mikino y’imbere mu gihugu no mu mahanga.”

Julián Martínez Alman w’imyaka 56 si ubwa mbere agiye gutoza mu Rwanda kuko yahoze atoza REG WBBC.

Ayandi makipe yatoje arimo Interclube Sports Club yo muri Angola, Belfius Namur Capitale yo mu Bubiligi, Umea Udominante yo muri Suède, CD Promete yo muri Espagne n’izindi.

Asanze APR WBBC iheruka kwegukana Igikombe cya Rwanda Cup 2026, itsinze REG WBBC ku mukino wa nyuma.

Iyi kipe y’Ingabo z’Igihugu iri kwitegura irushanwa rya rihuza amakipe yo mu Karere ka Gatanu azahatanira itike yo gukina imikino Nyafurika ya Africa Women’s Basketball League (AWBL), izabera i Nairobi muri Kenya guhera tariki ya 17 kugeza ku ya 24 Ukwakira 2026.