Police FC na Kiyovu Sports zageze ku mukino wa nyuma wa FERWAFA Super Cup

Police FC yatsinze Rayon Sports penaliti 4-2 nyuma yo kunganya ubusa ku busa mu minota 90 isanzwe naho Kiyovu Sports itsinda Mukura VS igitego 1-0, amakipe yombi agera ku mukino wa nyuma wa FERWAFA Super Cup.

Iyi mikino yombi ya 1/2 yabereye kuri Kigali Pele Stadium, kuri uyu wa Kane, tariki ya 27 Kanama 2026. Umukino wari witezwe n’abakunzi b’umupira w’amaguru wahuje Rayon Sports na Police FC.

Ni umukino watangiranye imbaraga nyinshi, amakipe yombi agerageza kurema uburyo bwo gutsinda igitego hakiri kare.

Mu minota 20, ikipe Police FC yongereye imbaraga isatira izamu rya Rayon Sport harimo umupira  na Luc Ndohounga yateye n’umutwe ukurwamo na Dande Junior, Ndizeye Samuel ashatse kuwushyira mu izamu ujya muri koruneri itagize icyo itanga.

Mu minota 30, Rayon Sports na yo yihariye umupira hagati mu kibuga binyuze mu bakinnyi barimo Atisso Kodjo na Tony Kitoga.

Igice cya mbere cyarangiye amakipe yombi anganya ubusa ku busa.

Rayon Sports yatangiranye impinduka mu gice cya kabiri, Iradukunda Elie Tatou asimbura Tony Kitoga.

Izi mpinduka zafashije gukomeza gusatira ishaka gufungura amazamu harimo Kameni yateye ari mu rubuga rw’amahina, ariko Nsabimana Zidane awukuraho bataratsinda igitego.

Mu minota 60, iyi kipe yakomeje gukina neza binyuze ku ruhande rw’iburyo rwa Iradukunda Elie wahinduraga imipira myinshi imbere y’izamu ariko, ubwugarizi bwa Police FC bukomeza guhagarara neza.

Mu minota 70, Police FC yongeye kwisanga mu mukino harimo umupira  Luc Ndohounga yananiwe gutera ari ari imbere y’izamu, ba myugariro ba Rayon Sport baratabara barawurenza.

Iminota 10 ya nyuma yihariwe na Rayon Sports yasatiraga cyane harimo uburyo bwahushijwe na Kameni ku mupira yateye n’umutwe ari wenyine imbere y’izamu, ariko kubera imbaraga nyinshi ujya hejuru yaryo.

Iminota 90, isanzwe yarangiye amakipe akomeje kunganya ubusa ku busa, hitabazwa penaliti kugira ngo hamenyekane ikipe igera ku mukino wa nyuma.

Police FC ni yo yitwaye neza itsinda penaliti 4 kuri 2 za Rayon Sports zinjijwe na Nshimirimana Ismael, Moussa Lemane, Kwitonda Alain na Mudahemuka Jean de Dieu.

Ni mu gihe ebyiri za Rayon Sports zahushijwe na Nshuti Didier, Junior Kameni

Umukino wabanjirije uyu, Kiyovu Sports yasezereye Mukura VS, iyitsinze igitego 1-0 cyinjijwe na Mugisha Didier kuri penaliti yo mu minota ya nyuma. Umukino warangiye amakipe yombi afite abakinnyi 10 nyuma yo guhabwa ikarita itukura ku mpande zombi.

Umukino wa nyuma hagati ya Police FC na Kiyovu Sports uteganyijwe ku Cyumweru, tariki ya 30 Kanama 2026, guhera saa cyenda kuri Kigali Pele Stadium.