Bruno Fernandes yatowe nk’umukinnyi w’umwaka muri Premier League

Umunya-Portugal Bruno Fernandes ukinira Manchester United yatowe nk’umukinnyi w’umwaka muri Shampiyona y’u Bwongereza mu bihembo bitangwa n’Ishyirahamwe ry’Abakinnyi muri iki gihugu (Professional Footballers’ Association).

Ku mugoroba wo ku wa Kabiri tariki 25 Kanama 2026, ni bwo abakinnyi bahize abandi muri Premier League ya 2025/26 bashyikirijwe ibihembo byabo.

Bruno Fernandes wagize umwaka w’imikino udasanzwe, ni we watowe nk’uwahize abandi, aho yanditse amateka yo kuba umukinnyi wa mbere mu mateka y’iyi shampiyona watanze imipira 21 yavuyemo ibitego, mu mikino 35 yakinnye muri uyu mwaka anafasha Manchester United gusoreza ku mwanya gatatu ndetse ikatisha itike yo gukina imikino ya UEFA Champions League 2026/27 yaherukagamo mu 2023. 

Bruno yahize abarimo Rayan Cherki na Erling Haaland bakinira Manchester City. Hari kandi Gabriel Magalhães, David Raya na Declan Rice bakinira Arsenal.

Nico O’Reilly ukinira Manchester City, yahembwe nk’umukinnyi mwiza ukiri muto, nyuma yo gutsinda ibitego bitanu agatanga imipira itatu yavuyemo ibitego mu mwaka ushize.

Uyu mukinnyi w’imyaka 21 yahigitse Rayan Cherki bakinana muri Manchester City, Eli Junior Kroupi na Alex Scott ba AFC Bournemouth.

Hari kandi Kobbie Mainoo wa Manchester United, Mateus Fernandes wakiniraga West Ham, Lewis Hall wa Newcastle na Michael Kayode wa Brentford.

Ikipe y’umwaka yiganjemo abakinnyi ba Manchester City na Arsenal.

Iyi kipe igizwe n’umunyezamu David Raya (Arsenal ), myugariro ni Gabriel Magalhães (Arsenal), William Saliba (Arsenal), Jurrien Timbere (Arsenal) na Nico O’Reilly (Manchester City). 

Abakina hagati ni Ryan Declan Rice (Arsenal) na Bruno Fernandes (Manchester United) na Rayan Cherki (Manchester City). Ni mu gihe ba rutahizamu ari Erling Haaland (Manchester City), Antoine Semenyo (Manchester City) na Igor Thiago (Brentford).