Rwanda Premier League 2026/27 izakoreshwamo ingengo y’imari ingana na miliyari 1,28 Frw

Urwego rutegura Shampiyona y’Icyiciro cya mbere mu Rwanda (Rwanda Premier League) rwemeje ko ingego y’imari y’umwaka wa 2026/27 izaba ingana na miliyari 1,2 Frw, ndetse amakipe yo muri Sudani agabanyirizwa abanyamahanga akinisha mu kibuga.

Ni umwe mu myanzuro yafatiwe mu nama y’inteko rusange isanzwe yahuje abanyamurango ba Rwanda Premier League kuri iki Cyumweru, tariki ya 23 Kanama 2026, igamije kurebera hamwe ibizagenga umwaka mushya w’imikino.

Rwanda Premier League yemeje ingengo y’imari y’umwaka w’imikino wa 2026/27 ingana na miliyari 1,28 Frw. Aazakoreshwa mu bikorwa birimo guhemba amakipe yitwaye neza ndetse n’ibindi bijyanye n’imikorere ya buri munsi y’uru rwego rutegura shampiyona.

Iyi nama yasize yashyizweho amabwiriza mashya ku makipe y’abashyitsi akomoka muri Sudani akina muri Shampiyona ari yo Al Hilal SC na Al Merrikh SC.

Hemejwe ko guhera muri Shampiyona ya 2026/27, mu gihe ikipe yo muri Sudani yaba iya mbere, izahabwa Igikombe cy’Icyubahiro (Honorary Trophy) naho icya Shampiyona (BK Pro League Champions) gihabwe ikipe yo mu Rwanda yagize amanota menshi.

Abanyamuryango bemeje ko aya makipe azajya ahabwa ibihembo bigenerwa ikipe yitwaye neza mu mukino.

Abakinnyi bayo na bo bafite uburenganzira ku bihembo by’abitwaye neza, uhereye ku mukinnyi w’umukino kugeza ku mukinnyi mwiza w’umwaka, ku rwego rungana n’urw’amakipe yo mu Rwanda.

Aya makipe kandi azemererwa gukoresha abakinnyi b’abanyamahanga batandatu mu kibuga mu gihe ku rupapuro rw’abakinnyi bakoresha ku mukino atazajya arenza abakinnyi umunani b’abanyamahanga nk’uko bimeze ku makipe yo mu Rwanda.

Mu mwaka ushize ubwo aya makipe yo muri Sudani yakinaga bwa mbere Shampiyona y’u Rwanda yari yemerewe gukoresha abakinnyi bose bafite ku rupapuro rw’umukino.

Mu mwaka ushize w’imikino amakipe yitwaye neza ni Al Hilal SC yegukanye Igikombe cya Shampiyona cy’Icyubahiro, mu gihe APR FC yegukanye icya BK Pro League ku makipe yo mu Rwanda.

Biteganyijwe ko Shampiyona ya 2026/27 izatangira tariki ya 4 Nzeri 2026, igasozwa ku wa 30 Gicurasi 2027.