Nyagatare – Kinihira: Abatujwe na Leta barashima inkunga y’imashini zizabafasha kwigira

Imiryango 62 irimo abaturage 184, barimo abatishoboye barokotse Jenoside yakorewe Abatutsi mu 1994 n’abandi batishoboye bari batuye ahantu hatari hameze neza, batujwe mu Mudugudu wa Kinihira, mu Murenge wa Nyagatare, mu Karere ka Nyagatare, bavuga ko imashini zidoda bahawe n’ubuyobozi zizabafasha kwihangira umurimo bakaniteza imbere.

Abenshi muri bo bari bagifashwa na Leta nko gutanga ubwisungane mu kwivuza, gufashwa kuvuzwa n’ibindi, bafite icyizere ko imashini bahawe zizabafasha kwihangira imirimo bakigira, ku buryo mu minsi iri imbere hari umubare w’abazaba babasha kwikemurira ibibazo birimo n’ibi Leta ikibafashamo.

Mu rwego rwo gukomeza kubaherekeza no kubafasha kwifasha ubuyobozi bw’Akarere ka Nyagatare bwabageneye imashini zidoda 10 zifite agaciro ka miliyoni 2 Frw kugira ngo bazikoreshe zibafashe kwinjiza amafaranga bite ku miryango yabo. Bavuga ko bafite icyizere ko mu minsi iri imbere hari umubare w’abazaba babasha kwikemurira ibibazo birimo n’ibi Leta ikibafashamo.

Batamuriza Joseline uyoboye itsinda ry’abahawe imashini yagize ati: “Turashima cyane ubuyobozi bwadukuye mu gucumbika bukatwubakira inzu ariko bukaba bunakomeje kudufata akaboko kugira ngo tugere ku bushobozi bwo kwifasha. Izi mashini duhawe tugiye kuzikoresha dukorere amafaranga. Twizeye ko zizagira aho zidukura naho zitugeza ndetse ibyo tuzikuramo bikazadufasha no kuba twakora n’indi mishinga mito iduteza imbere.”

Akomeza agira ati: “Umuntu uzaba yakoze akagira icyo yinjiza bizamufasha kwikenura mu rugo abashe kwigurira bimwe mu byo akeneye kandi abe yanizigamira ateganyiriza iminsi mibi”

Kabagwira Cecile ufite imyaka 80. Avuga ko nubwo adafite ubushobozi bwo gukoresha izi mashini ariko inyungu zizamugeraho biturutse ku kuba zakoreshwa n’umwe mu bo mu muryango we cyangwa zigaturuka mu itsinda bahuriyemo.

Ati: “Ibi ni ibyiza gusa dukomeje kwishimira aho ubuyobozi buri kudusajisha neza. Hari abafite abana barangije kwiga imyuga irimo n’ubu budozi. Umwana naza gukora akabona akazi azatunga umuryango bityo imibereho irusheho kuba myiza.”

Masengesho Esther we yagize ati: “Izi mashini duhawe ni igisubizo ku babyeyi bacu natwe ubwacu. Abazi kudoda bazazibonamo akazi ariko n’abakiri bato batazi kudoda bazabihigira kuko bizaba bikorerwa aha iwacu. Tugiye kuzikoresha ku buryo dupatana amasoko nk’ay’ibigo by’amashuri n’abandi bakenera gukoresha imyambaro y’ubwoko bitandukanye tubibakorere batwishyure.”

Umuyobozi w’Akarere ka Nyagatare wungirije ushinzwe Imibereho myiza y’Abaturage, Murekatete Juliet yasabye abahawe izi mashini kuzitaho bakazifata neza zikazababera umusingi w’iterambere.

Yagize ati: “Leta irabakunda kandi izakomeza kubakunda. Turabizi ko mugifite ingorane mukirwana na zo kugira ngo muve koko mu cyiciro cyo kutishobora mwigire, ari yo mpamvu twabageneye n’iyi mpano kugira ngo muyibyaze umusaruro mukore muve ku rwego rumwe mugere ku rundi. Murasabwa kuzikoresha kandi neza mukazibungabunga kuko ni izanyu kandi inyungu izaziturukamo ni mwe izagirira umumaro bwa mbere.”

Uyu muyobozi yabwiye abahawe izo mashini ko bishimishije kuba abenshi bafite ubumenyi bujyanye no kudoda abizeza ko abatabizi na bo bazafashwa gushakirwa umwalimu uza kubigishiriza aho batuye bakigishirizwa ku mashini zabo aho bizafasha kubimenya vuba bakagendana n’abandi.