RDC: Abamaze kwicwa na Ebola barenze 2 000

Kuri uyu wa 11 Kanama 2026, Repubulika Iharanira Demokarasi ya Congo (RDC) yatangaje ko abantu bamaze kwicwa n’icyorezo cya Ebola bageze ku 2 011 mu gihe abanduye ari 4 381 bo mu Ntara eshanu zo mu Burasirazuba bw’icyo Gihugu zibasiwe bikomeye n’icyo cyorezo,kuva muri Gicurasi 2026.

Imibare yatangajwe n’inzego za Leta igaragaza ko abantu 1 000 bapfuye bahitanywe na Ebola mu byumweru bitatu bishize, mu gihe iyi virusi ikomeje gukwirakwira ku muvuduko uteye impungenge.

Gukwira vuba no gukomera kw’iki cyorezo byatijwe umurindi n’impamvu zitandukanye zirimo n’imyigaragambyo iherutse kuba yatumye  abakora mu rwego rw’ubuzima bahagarika akazi kubera kudahembwa kuva icyo cyorezo cyakwaduka.

Byatijwe umurindi kandi no kutubahiriza amabwiriza agenga uwanduye cyangwa uwahitanywe na Ebola, aho bamwe mu bagize umuryango w’uwishwe na yo  bagira uruhare mu kumushyingura kandi bitemewe ndetse biri mu byongera ibyago byo gukwirakwira kwa virusi.

Kugeza ubu nta muti cyangwa urukingo biraboneka ariko Ishami ry’Umuryango w’Abibumbye ryita ku Buzima (OMS) ryatangaje ko mu cyumweru gishize hari igeragezwa ry’urukingo ryatangiye, ariko bishobora gufata amezi menshi mbere y’uko ibisubizo byarwo biboneka.

OMS yatangaje ko virusi ya Ebola yo mu bwoko bwa Bundibugyo yagaragaye bwa mbere muri RDC muri Gashyantare 2026, amezi atatu mbere y’uko iki cyorezo gitangazwa ku mugaragaro muri RDC no muri Uganda tariki ya 15 Gicurasi 2026.