Nyagatare: Hamenwe inzoga zitujuje ubuziranenge zisaga litiro 47 637 z’asaga miliyoni 317 frw

Kuri uyu wa Mbere tariki ya 19 Kanama 2026, Ubuyobozi bw’Akarere ka Nyagatare ku bufatanye n’inzego z’umutekano bamennye inzoga zitujuje ubuziranenge zakusanyijwe zikuwe hirya no hino mu mirenge aho zacururizwaga , ahamenwe  litiro  zisaga 102 000 zifite agaciro ka miliyoni 317 Frw.

Igikorwa cyo kwangiza no kumena inzoga zitemewe zigira ingaruka ku buzima bw’abaturage cyabereye mu Kagali ka Barija ho mu Murenge wa Nyagatare. Ubuyobozi bw’Akarere ka Nyagatare bwagaragaje ko kuva iki gikorwa cyatangira mu cyumweru gishize hafashwe litiro zisaga ibihumbi ijana na bibiri ndetse n’ibikoresho byinshi byifashishwaga n’abakoreraga zimwe muri izi nzoga mu Karere ka Nyagatare.

Umuyobozi wungirije w’Akarere ka Nyagatare ushinzwe Iterambere ry’Ubukungu Matsiko Gonzague yagaragaje ko iki gikorwa kiri mu rwego rwo kurengera abaturage nyuma y’aho ubuyobozi Bukuru bw’Igihugu bugaragarije ko izi nzoga ari icyorezo ku buzima bw’abaturage.

Yagize ati: ”Nkuko byagiye bigaragazwa n’Inzego nkuru z’Igihugu cyacu, izi nzoga zari icyorezo ku baturage. Twihutiye kuzikura mu baturage, aho zacururizwaga ndetse naho zakorerwaga kugira ngo duhagarike ikoreshwa ryazo. Kuri ubu turi kuzimena ariko tunasaba abaturage kumva ko biri mu nyungu zabo bityo banafashe kugaragagaza ahaba hakiri n’izindi nazo zimenwe.”

Umuyobozi wa Polisi wungirije mu Ntara y’Iburasirazuba ACP Innocent Kanyamihigo yabwiye abaturage ko guca izi nzoga bizafasha mu kugira ubuzima bwiza no gukumira ibibangamira umutekano.”

Ati: ”Murabizi namwe aho mutuye ko ubusinzi bukabije buri mu bibateza amakimbirane ndetse n’urugomo. Guca izi nzoga rero biraza gutuma mugira ubuzima bwiza ariko binabarinde ibyaha bituruka ku guteza umutekano muke.

Bamwe mu baturage baganiriye n’Imvaho Nshya bavuga ko izi nzoga zari mu bibabangamiye bagahamya ko nta gihombo bazaterwa no kuba zitagihari.

Mukunzi Anicet ukora akazi ko gutwara abagenzi kuri moto yagize ati: ”Ntacyo tuzahomba biturutse ku kubura izi nzoga. Nkange wenda najyaga ntumwa n’abazicuruza nkazibagereza ku bakiliya ariko nta gihombo nimbura ako kazi ariko nkunguka ubuzima buzima  n’abaturage bazampa akandi kazi.”

Furaha Irarora ukiri urubyiruko na we yagize ati: ”Guca izi nzoga twabyakiriye neza kuko byangizaga urubyriruko. Biroroshye kubwira umuntu kwirinda ibiyobyabwenge nta naho afite abikura, kuruta kubimubuza ariko asohoka mu nzu akabona imbere ye bihari. Guca izi nzoga bigiye gutuma umubare munini w’urubyriruko wazishoragamo batekana.”

Kuva igikorwa cyo gukusanya inzoga zitujuje ubuziranenge zivanwa aho zicururizwa cyatangira mu cyumweru gishize, mu Karere ka Nyagatare hamaze gukusanywa litiro zisaga 102 000 ziganjemo inzoga z’ibyuma zakorerwaga mu Rwanda no mu bihugu by’abaturanyi.