Ibiciro ku masoko mu Rwanda byiyongereho 14,5% muri Nyakanga 2026

Ikigo cy’Igihugu gishinzwe Ibarurishamibare (NISR), cyatangaje ko ibiciro ku masoko muri Nyakanga 2026 byiyongereye ku kigero cya 14,5% ugereranyije na Nyakanga 2025. Ibipimo byatangajwe kuri uyu wa 10 Kanama 2026, byerekanye ko ibiciro mu mijyi byiyongereye bitewe ahanini n’ibiciro by’ibiribwa n’ibinyobwa bidasembuye byiyongereyeho 13,1%, ibiciro by’ibinyobwa bisembuye n’itabi byiyongereyeho 9,8%, ibiciro by’inzu, amazi, amashanyarazi, gaze n’ibindi bicanwa byiyongereyeho 21%.

Hari kandi ibiciro by’ibijyanye n’ubwikorezi byiyongereyeho 24,2% n’ibiciro by’amafunguro n’icumbi byiyongereyeho 14,2%. NISR yagaragaje ko ugereranyije Nyakanga 2026 na Kanama 2026, ibiciro byiyongereyeho 0,9%.

Iri zamuka ryatewe ahanini n’ibiciro by’ibiribwa n’ibinyobwa bidasembuye byiyongereyeho 1,5% n’ibiciro by’ibijyanye n’ubwikorezi byiyongereyeho 1,3%.

Muri rusange ugereranyije Nyakanga 2026 na Nyakanga 2025, ibiciro by’ibintu bitarimo ibiribwa n’ibikomoka ku ngufu byiyongereyeho 11,4%.

Muri Nyakanga 2026, ibiciro mu byaro byiyongereyeho 13,3% ugereranyije na Nyakanga 2025. Ibiciro mu kwezi kwa Kamena 2026 byari byiyongereyeho 12,1%.