MINICOM yashyizeho igiciro fatizo cy’ibigori bihunguye n’ ibidahunguye

Minisiteri y’Ubucuruzi n’Inganda (MINICOM) yatangaje igiciro fatizo ku kilo cy’ibigori bihunguye n’ibidahunguye gihabwa umuhinzi, hashingiwe ku myanzuro y’inama yabaye ku wa Mbere taliki ya 14 Gashyantare 2022.

Iyo nama yahuje Minisiteri y’Ubucuruzi n’Inganda (MINICOM), Minisiteri y’Ubuhinzi n’Ubworozi (MINAGRI), Ikigo cy’lgihugu gishinzwe guteza imbere Ubuhinzi n’Ubworozi (RAB), Abayobozi bungirije b’Uturere bashinzwe ubukungu, abayobozi bashinzwe Ubucuruzi n’Ubuhinzi mu Turere tugira umusaruro mwinshi, abahagarariye abahinzi b’ibigori, Inganda zibitunganya n’abaguzi banini b’ibigori mu Rwanda.

Abahinzi b’ibigori, abaguzi n’inganda zitunganya ibigori ndetse n’Abanyarwanda muri rusange bamenyeshejwe ko igiciro fatizo ku kilo cy’ibigori bihunguye kandi byujuje ubuziranenge gihabwa umuhinzi ari amafaranga y’u Rwanda magana abiri na mirongo itatu n’arindwi ku kilo (237 Rwf/Kg) na magana abiri na cumi n’atanu ku kilo (215 Rwf/Kg) ku bigori bidahunguye (cobs).

Minisiteri y’Ubucuruzi n’Inganda (MINICOM) yaboneyeho kwibutsa abahinzi n’abaguzi b’ibigori ko umusaruro wose w’ibigori ugurishwa ugomba gukusanyirizwa ahabugenewe mu rwego rwo kunoza imicururize yawo.

Ikindi kandi ni uko abaguzi bose basabwa kuba bafite ibyangombwa bigaragaza ko bemerewe gucuruza umusaruro ukomoka ku buhinzi (Company registration Certificate).

Minisiteri y’Ubucuruzi n’Inganda kandi irabasa Inzego z’ibanze kuba hafi abahinzi bakabafasha mu gukurikirana iyubahirizwa ry’igiciro cyashyizweho no gukumira abamamyi (Middlemen) bahenda abahinzi.

Ku bifuza gytanga amakuru cyangwa kumenya ibindi bisobanuro, bahamagara ku murongo wa telefoni utishyurwa wa 3739.