Twinjirane muri Shampiyona y’Isi y’Umukino w’amagare ku munsi 3 (Live)

Imvaho Nshya ibahaye ikaze ku munsi wa Gatatu wa shampiyona y’Isi y’umukino w’amagare. Kuri uyu wa Kabiri tariki 23 harasiganwa abakinnyi bato mu bagore aho bagiye gukoresha intera y’ibilometero 18.3.

Igice cyo gusiganwa n’isaha buri muntu ku giti cye kirarangirana n’uyu munsi wa gatatu w’irushanwa; ku bagabo n’abagore.

Kuva mu 1927, shampiyona y’Isi y’umukino w’amagare yitabirwaga n’abagabo gusa, ariko mu 1958 ku nshuro ya mbere hongerwamo icyiciro cy’abagore, naho mu 1975 hongerwamo ibyiciro by’abakiri bato.

Mu 1994 nibwo hatangijwe igice cyo gusiganwa n’isaha umuntu ku giti cye (ITT) mu byiciro byose byakinwaga.

Bwa mbere mu 2022 hahembwe abitwaye neza, batarengeje imyaka 23 mu bagore, gusa icyo gihe bakinanaga n’abakuru muri iki cyiciro.

Ni mu gihe 2025 i Kigali mu mutima w’Afurika ku nshuro ya mbere kuri uyu mugabane, hakomeje kwandikwa amateka yo kuba ku nshuro ya mbere abatarengeje imyaka 23 mu bagore bagiye gukina ukwabo.

Abasiganwa barahagurukira kuri BK Arena i Remera – Kimironko (Simba Supermarket) – Rwahama – Chez Lando – Prince House – Sonatube – Nyanza – kugaruka Sonatube – Rwandex – Kanogo – Mediheal – Women Foundation Ministries (Kwa Mignone) – Ku Muvunyi – KCC.

Umunya-Espagne, Paula Jessica Ostiz Taco, uzwi cyane mu isiganwa ry’umukino w’amagare, ubu ari i Kigali mu rw’imisozi 1 000.

Igihangange Paula Ostiz yabonye izuba tariki 12 Mutarama 2007. Umwaka ushize 2024 yaje ku mwanya wa mbere muri shampiyona y’Isi y’umukino w’amagare mu ngimbi.

Abasesenguzi mpuzamahanga ku mukino w’amagare baravuga ko uyu munya-Espagne ashobora kwigukana irushanwa ry’uyu munsi mu bagore bato.

11hh06’00”: Umunyarwandakazi Yvonne Masengesho ni we ubimburiye abandi mu guhaguruka.

11h07’30”: Umunya-Nigeria OGBE Divine akurikiyeho.

11h10’30”: Umunya-Ethiopia GIMBATO Rahel, arahagurutse nyuma yo kwerekwa ibyishimo afitiwe n’abari muri BK Arena.

11h13’30”: Umunya-Bénin VIGNONFODO N Georgette arahagurutse.

11h15′: Umunyarwandakazi Masengesho asigaje gukoresha intera y’ibilometero 12.4 amaze gukoresha iminota 8.

11h19′: Umunya-Burukinafaso, YAMEOGO Elvine Marie Rose asigaje intera y’ibilometero 14.5 amaze gukoresha iminota 5.

11h20′: Masengesha ageze i Nyanza ahita akata agarukaka.

11h22’30”: Umunya-Uzbekistan, ISMAILOVA Samira, arahagurutse akomerwa amashyi y’urufaya.

11h27’00”: Umunya-Namibia JANSE van VUUREN Delsia ahagurutse ari umukinnyi wa 15 mu bakinnyi 47.

11h29′: Umunyarwandakazi Yvonne Masengesho ayatangiye kuzamuka kwa Mignone mu mapave. Asigaje gukoresha intera y’ibilometero 2.

11h30′: Umunyarwandakazi Uwiringiyimana Liliane na we ahagurutse muri BK Arena yishimiwe n’abafana.

11h33′: Umunyarwakazi Masengesho ni we uza ku isonga mu bamaze gukora intera y’ibilometero 13.7 akaba amaze gukoresha iminota 19’25”.

11h36′: Yvonne Masengesho abimburiye abandi kugera KCC akoresheje 29’43”04 mu gihe ari na we wahagurutse mbere y’abandi.

11h40’30”: DANSHINA Polina udafite igihugu ahagarariye muri shampiyona y’Isi y’Umukino w’amagare, arahagurutse.

11h42′: Umuhinde JAKHAR Harshita atangiye kuzamuka kwa Mignone, asigaje gukoresha intera y’ibilometero 2.2 akoresheje iminota 29.

11h44′: Umunyabigwi w’umunya-Cyprus, Alexandra Safiri, ahigitse Umunyarwandakazi Yvonne Masengesho ku rutonde rusange kuko ageze KCC akoresheje ibihe bingana n’iminota 27’46”58.

11h48′: Uku ni ko urutonde rusange rw’agateganyo ruhagaze.

11h49′: Umunya-Chile, Marlen Rojas Lescot, ahigitse Safiri Alexandra ku mwanya wa mbere ku rutonde rusange, aho ageze KCC amaze gukoresha iminota 27’28”05.

11h51′: Umwongerezakazi MILLER Abigail ahagurutse kuri BK Arena.

11h53′: Kugeza ubu urutonde rusange rw’agateganyo ni uku ruhagaze.

11h56′: Umwongerezakazi, MILLER Abigail, asigaje intera y’ibilometero 15.3 amaze gukoresha iminota 4.

11h57′: Umunya-Ethiopia, Tsige Kiros, ageze KCC ahita afata umwanya wa 4 ku rutonde rusange rw’agateganyo.

12h00′: Kugeza ubu hamaze guhaguruka no gukina abakinnyi bageze kuri 37 mu bakinnyi 47 bagomba gukina mu cyiciro cy’abagore bato.

12h05′: Umunyarwanda uza ku mwanya wa hafi ku rutonde rusange rw’agateganyo ni Yvonne Masengesho uri ku mwanya wa 9.

12h08′: Umwongerezakazi Abigail Miller asigaje ibilometero 5.9 amaze gukoresha iminota 16.

12h09′: Hamaze guhaguruka abakinnyi 42 mu bakinnyi 47 b’abagore bato barimo gukina shampiyona y’Isi y’umukino w’amagare.

12h11′: Uku ni ko urutonde rusange rw’agateganyo ruhagaze, rukaba ruyobowe n’Umwongerezakazi GISSINGER Oda Aune, wakoresheje ibihe bingana na 26’24”95.

12h15′: Umwongerezakazi, BOOTHMAN Erin, ni we uhagurutse nyuma y’abandi bakinnyi aho barimo guhagurukira kuri BK Arena.

12h18′: Umwongerezakazi, GISSINGER Oda Aune, kugeza ubu ni we ukiyoboye urutonde rusange rw’agateganyo. Ni mu gihe kandi Umunyarwandakazi uza ku mwanya wa hafi ari Yvonne Masengesho uri ku mwanya wa 19.

12h20′: Igihangange mu isiganwa ry’umukino w’amagare cyo muri Poland, OKRUCINSKA Maria, ageze KCC ari ku mwanya wa 3 w’urutonde rusange rw’agateganyo.

12h25′: Uku ni ko urutonde rusange rw’agateganyo rw’abakinnyi batanu ba mbere.

12h30′: Umunya-Espagne, Paula Ostiz Taco, asigaje gukora intera y’ibilometero 5.2 akaba amaze gukoresha iminota 16.

12h35′: Umwongerezakazi, BOOTHMAN Erin, wahagurutse nyuma y’abandi amaze kugenda intera ya kilometero 2.7 amaze gukoresha iminota 19.

12h38′: Umunya-Canada, Sidney Swierenga, asesekaye KCC ari ku mwanya wa 4 ku rutonde rusange rw’agateganyo.

12h38′: Habayeho impinduka ikomeye aho Umunya-Netherkands, Arens Megan, ahigitse umwongerezakazi ku mwnaya wa mbere ku rutonde rusange rw’agateganyo. Akoresheje iminota 25’47”41.

12h41′: Uku ni ko urutonde rusange rw’agateganyo ruhagaze kugeza ubu.

Isiganwa ry’umunsi wa Gatatu rizwi nka ITT mu cyiciro cy’abagore bato muri shampiyona y’Isi y’umukino w’amagare, rirangiye ryegukanwe n’Umunya-Netherlands, ARENS Megan.

Umunyarwandakazi uza ku mwnaya wa hafi ni Yvonne Masengesho uri ku mwanya wa 33 mu gihe mugenzi we Liliane Uwiringiyimana ari ku mwanya wa 40 ku rutonde rusange.